மலைக்கு நேரே ஊருக்குள் உள்ள ஏகாம்பரேஸ்வரர் கோயில் உள்ளது. இவ்விரு கோயில்களும் எதிரெதிரே உள்ளது. சித்திரைப் பிறப்பன்று 240 படிகளுக்கும் பூஜை நடக்கும். ஆடி வெள்ளி அம்பிகைக்குரிய நாளாக இருந்தாலும், முருகனுக்கு சிறப்பு பூஜை நடப்பது விசேஷம். பொதிகை சென்ற அகத்தியர், இங்கு முருகனைத் தரிசிக்க வந்தார். அப்போது, முருகன் வளையல் விற்கும் செட்டியாராக அவருக்கு காட்சி தந்தார். இதனால் ஊர் "செட்டிகுளம்' எனப்பட்டது. வடபழநிமலை என்றும் இத்தலத்திற்கு பெயருண்டு. மதுரையில் இருந்து கோபத்துடன் கிளம்பிய கண்ணகியை, இத்தல முருகன் சாந்தப்படுத்தினார். இதனால், உக்கிரம் குறைந்த அம்பிகை, இவ்வூர் அருகிலுள்ள சிறுவாச்சூரில் மதுரகாளியம்மனாக கோயில் கொண்டுள்ளாள்.

மலைக்கு ஏறும் படிக்கட்டுகள் 240ம் இறங்கும் படிக்கட்டுகள் 253ம் அமைந்துள்ளது. இம்மலைமீதுள்ள முருகன் செட்டிகுளத்தில் , சிவ ஆலயத்தில் உள்ள ஏகாம்பரேசுவரரை அதாவது தனது அப்பாவை பார்த்தபடி உள்ளார் என்பது விசேசம். முருகனின் படைத்தளபதி வீரபாகு இங்கு வீரபத்திரசுவாமியாக விளங்குகிறார்.

கல்யாண வரம், குழந்தை வரம் வேண்டுவோர் இத்தலத்தில் பெருமளவில் வந்து வழிபடுகின்றனர்.

இத்தலத்து முருகனை வணங்குவோர்க்கு நோய்கள், மற்றும் உடல் உபாதைகள், வழக்கு சிக்கல்கள், காணமாற் போன பொருட்கள், வியாபார சிக்கல் முதலியன நீங்குவதால் இத்தலம் சிறப்பு பெற்று வருகின்றது. படி ஏறி வந்து முருகனை வழிபடுவதால் கை கால் சுகம் பெறுகிறது. மேலும் இத்தலம் மலைக்கோயில் என்பதால் மலையில் உள்ள மூலிகை காற்றை சுவாசித்துக் கொண்டே பக்தர்கள் செல்லும்போது தங்கள் உடம்பில் உள்ள பல நோய்கள் விலகுகின்றன.

தலை முடி உள்ள தண்டாயுதபாணி: தண்டாயுதபாணிக் கடவுள் என்றால் மொட்டையாண்டியாக இருப்பார் என்று நினைத்து விடக்கூடாது. பழநியில் உள்ள தண்டாயுதபாணிக்கடவுள் மொட்டைதலையுடன் ஆண்டியாக உள்ளார். அதுபோல இங்கு கிடையாது. இங்குள்ள தண்டாயுதபாணிக் கடவுள் தலையில் முடியுடன் காணப்படுகிறார். இங்குள்ளவர் சுயம்பு மூர்த்தி ஆவார். சுவாமி 4 ஆடி உயரம் இருப்பவராக உள்ளார். கையில் 11 கணுக்களுடைய செங்கரும்பை ஏந்தியபடி காட்சி தருகிறார். இது வேறு எந்த முருகன் தலத்திலும் காண முடியாத அரிய சிறப்பு.

வளையல் செட்டி: வளம் மிகு செட்டிகுளம் வடபழநி மலைமீது கோயில் கொண்டு அகத்திய மாமுனிவருக்கு வளையல் செட்டிவடிவாக முருகன் இத்தலத்தில் காட்சி தந்தாராம். கண்ணகியின் கடும்சினத்தை தணித்து சிறுவாச்சூரில் மதுரகாளியாக அமர ஆற்றுப்படுத்தி, உறையூர் சோழன் பராந்தகனுக்கும் பாண்டியன் குலசேகரனுக்கும் முதியவர் வடிவில் தோன்றி சிவலிங்க இருப்பிடம் காட்டியவர் என்றும் இத்தலத்தில் முருகப்பெருமானின் சிறப்பு சுட்டிக்காட்டப்படுகிறது.

இத்தலத்து முருகப்பெருமான் பழநியில் இருப்பதைப் போன்று இங்கும் மலைமீது தண்டாயுதபாணியாக காட்சி தருவதால் இத்தலம் வடபழநி எனவும் வழங்கப்படுகிறது. இத்தலத்தில் உள்ள முருகன் உளியால் செதுக்கப்படாத சுயம்பு மூர்த்தி என்பது முக்கியமான சிறப்பம்சம்.

இத்தலத்தில் உள்ள தண்டாயுதபாணிக் கடவுள் கையில் செங்கரும்புடன் உள்ளார். இவ்வாறு முருகன் கரும்புடன் காணப்படுவது வேறு எங்குமே பார்த்திர முடியாது. மலை மீது சுணை உள்ளது. அதற்கு தேனருவி என்று பெயர் இந்த சுணை வருடத்தின் 365 நாட்களும் தண்ணீர் இருக்கும். மழைக் காலத்தில் பெய்யும் மழை நீர் எல்லாமே மலையிலுள்ள மூலிகை மரம் செடி கொடிகளுக்கு இடையில் ஒடி வந்து கீழே உள்ள பஞ்ச நதிக்குளத்தில் விழும். எனவே இத்தலத்தில் குளிப்பவர்கள் பிணி நீங்கப்பெறுவர்.

பழநிக்கு நேர்ந்து கொண்டவர்கள் இத்தலத்தில் நேர்த்திகடனை செலுத்தலாம். அகத்தியர் வழிபட்ட சிறப்பு வாய்ந்த தலம்.

உச்சிக்குடுமி முருகன்: 240 படிகளுடன் உள்ள மலை மீது அமைந்த கோயில் இது. வழக்கமாக வேலுடன் காட்சி தரும் முருகன் இங்கு, கரும்புடன் காட்சியளிக்கிறார். அலங்காரத்தின்போது மட்டும் வேல், சேவல் கொடி வைக்கின்றனர். தலையில் உச்சிக்குடுமியும் உள்ளது. உற்சவர் கையில் வேல் இருக்கிறது. கரும்பு பார்ப்பதற்கு தடிமனாக இருந்தாலும், உள்ளே இனிமையான சாறு இருக்கும். இதைப்போலவே, நாமும் பார்ப்பதற்கு கரடு முரடானவராகத் தெரிந்தாலும், நற்குணம் கொண்ட நல்ல மனம் என்னும் இனிய சாற்றை கொண்டிருக்க வேண்டுமென்பதை இவர் உணர்த்துகிறார்.

கரும்புத்தொட்டில்: குழந்தை பாக்கியம் இல்லாதவர்கள், சஷ்டியன்று முருகனுக்கு பாலபிஷேகம் செய்து வழிபடுகிறார்கள். வேண்டுதல் நிறைவேறியதும் பங்குனி உத்திரத்தன்று, கரும்புத்தொட்டிலில் குழந்தையைக் கிடத்தி, கோயிலை வலம் வந்து நேர்த்திக்கடன் செலுத்துகின்றனர். விவசாயிகள், விவசாயம் செழிக்க இவரிடம் அதிகளவில் வேண்டிக்கொள்கிறார்கள். தங்கள் நிலத்தில் முதலில் விளைந்த தானியம், பழம், காய்கறிகளை முருகனுக்கு படைத்து நேர்த்திக்கடன் செலுத்துகின்றனர். மலையடிவாரத்தில் விநாயகர், பாதை நடுவே இடும்பன், கோயில் வளாகத்தில் ராஜகணபதி, வீரபாகு சன்னதிகள் உள்ளன. சிவனுக்குரிய வில்வமே இத்தலத்தின் விருட்சமாகும்.

மூன்று திருக்கல்யாணம்: வழக்கமாக கோயில்களில் விழாவின்போது ஒருநாள் மட்டும்தான் திருக்கல்யாணம் நடக்கும். இங்கு, ஒரே திருவிழாவில் ஒருநாள் விட்டு மறுநாள் என மூன்று முறை திருமணம் நடக்கிறது. பங்குனி உத்திரத்தை ஒட்டி நடக்கும் பிரம்மோற்ஸவத்தின் 5ம் நாள் மற்றும் 7ம் நாளிலும், உத்திரத்தன்று (9ம் நாள்) சுவாமி தேரில் எழுந்தருளும் முன் ஒருமுறை என மூன்று முறை திருக்கல்யாணம் நடக்கிறது. இவ்வேளையில் சுவாமியைத் தரிசித்தால் திருமணத்தடை உள்ளோருக்கு தோஷம் நீங்கி நல்ல வரன் அமையும். இவ்விழா நடக்கும் அனைத்து நாட்களிலும் சுவாமி கிரிவலம் சென்று வருவது மற்றொரு சிறப்பு.அருணகிரிநாதரால் பாடல் பெற்ற தலம்.