மடத்துக்குளம்;வரலாற்று சிறப்புமிக்க கோவில்களை, தொல்லியல் துறையின் கீழ்ஆவணப்படுத்தும் திட்டத்திற்காக, மடத்துக்குளம் பகுதியிலுள்ள பழமையான கோவில்களை அத்துறையினர் ஆய்வு செய்தனர்.தமிழ்நாட்டில் நுாற்றுக்கும் மேற்பட்ட கோவில்கள், ஆயிரம் ஆண்டுகளுக்கு முன்பு மன்னர்களால் கட்டப்பட்டு, இன்றும் வரலாற்றின் அடையாளங்களாக உள்ளன.

இதில், பல கோவில்கள் இன்னும் ஆவணப்படுத்தப்படாமல் உள்ளன.இதுபோல உள்ள கோவில்களை ஆவணப்படுத்த, இந்திய தொல்லியல் துறையின் ஆலய ஆய்வுத்திட்டம் நடைமுறைப்படுத்தப்பட்டுள்ளது.முதன்மை தொல்லியல் கண்காணிப்பாளர் மூர்த்தீஸ்வரி, தொல்லியல் ஆய்வாளர் பிரசன்னா, இந்து சமய அறநிலையத்துறையின் நிர்வாக அலுவலர் பவானி, திருப்பூர் இணை ஆணையர் நடராஜன் ஆகியோர் கொண்ட குழுவினர் இதில் ஈடுபட்டுள்ளனர்.இதற்காக, மடத்துக்குளம் பகுதிக்கு உட்பட்ட கடத்துார், கொமரலிங்கம், கணியூர், சோழமாதேவி ஆகிய இடங்களில் உள்ள, தொன்மையும் சிறப்பும் வாய்ந்த பழமையான கோவில்களை, இந்தக் குழுவினர் ஆய்வு செய்து வருகின்றனர்.இதன் ஒரு பகுதியாக, கொமரலிங்கம் அமராவதி ஆற்றங்கரையில் அமைந்துள்ள, கரி வரதராஜ பெருமாள் கோயிலில் ஆய்வு நடந்தது.கற்றளி (முழுக்க கருங்கல்லால் கட்டப்பட்டது) முறையில் அமைந்த,இந்தக்கோவிலின் வெளிப்புறத்திலும், மண்ணின்மேற்பரப்பிலும் மண்ணுக்குள் புதைந்தும்இருக்கக்கூடிய கல்வெட்டுகளையும், சிற்பங்களையும் ஆவணப்படுத்தும் பணியில் குழுவினர் ஈடுபட்டனர்.இவர்களுடன் உடுமலை வரலாற்று ஆய்வு நடுவத்தினர்களான, அருள்செல்வன், சிவகுமார், கற்பகவல்லி, பட்டதாரி ஆசிரியர் விஜயலட்சுமி, துணைத்தலைவர் ராஜசுந்தரம் ஆகியோரும்சென்றனர்.