தென்காசி: தென்காசி புனித மிக்கேல் அதிதூதர் ஆலய பெருவிழாவில் தேர்பவனி நடந்தது. தென்காசி புனித மிக்கேல் அதிதூதர் ஆலயத்தில் கடந்த 20ம் தேதி கொடியேற்றத்துடன் அதிதூதர் பெருவிழா துவங்கியது. தொடர்ந்து ஒவ்வொரு நாள் மாலையில் திருப்பலி, மறையுரை நடந்தது. விழாவின் எட்டாம் நாள் இரவில் நற்கருணை பவனி நடந்தது. விழாவின் ஒன்பதாம் நாளான நேற்று காலையில் சூளைமேடு உதவி பங்கு தந்தை சில்வெஸ்டர் திருப்பலி நடத்தினார். கொடைக்கானல் மறைமாவட்ட அதிபர் இக்னேசியஸ் பால் மறையுரை வழங்கினார். மதியம் புனலூர் மறை மாவட்ட ஆயர் செல்விஸ்டர் பொன்னுமுத்தன் மலையாளத்தில் சிறப்பு திருப்பலி நடத்தினார். இதில் திரளான கேரள இறைமக்கள் கலந்து கொண்டனர். மாலையில் பாளை., குருகுல முதல்வர் ஜோமிக்ஸ் திருப்பலி நடத்தினார். இரவு அலங்கரிக்கப்பட்ட தேரில் அதிதூதர் எழுந்தருளினார். பின்னர் தேர்பவனி நடந்தது. தென்காசி பங்குதந்தை வியாகப்பராஜ், உதவி பங்குதந்தை வினோத்பால்ராஜ் மற்றும் திரளான இறைமக்கள் கிறிஸ்தவ பாடல்களை பாடியபடியே தேர் பவனியில் பங்கேற்றனர். கலை நிகழ்ச்சி நடந்தது. விழாவின் முக்கிய நாளான இன்று (29ம் தேதி) பெருவிழா நடக்கிறது. காலையில் கடையம் பங்குதந்தை ஆரோக்கியசாமி, மேலமெஞ்ஞானபுரம் பங்குதந்தை அலாய்சியஸ் துரைராஜ், நவதுறவியர் இல்லம் அதிபர் வின்சென்ட் (மலையாளத்தில்), மதியம் ஆவுடையானூர் பங்குதந்தை அருள்ராஜ் திருப்பலி நடத்துகின்றனர். காலை 7.30 மணிக்கு திருவிழா திருப்பலியை பாளை., மறைமாவட்ட ஆயர் ஜூடுபால்ராஜ் நடத்துகிறார். மாலையில் பாளை., ஆயர் இல்லம் அமல்ராஜ் சிறப்பு திருப்பலி நடத்துகிறார். நாளை (30ம் தேதி) கொடியிறக்கம் நடக்கிறது.