திருப்பூர்: பிளஸ் 2 மற்றும், பத்தாம் வகுப்பு பொதுத்தேர்வு எழுதும் மாணவ, மாணவியர் நலனுக்காக, திருப்பூர் ஸ்ரீ வீரராகவப் பெருமாள் கோவிலில் உள்ள, ஸ்ரீ லட்சுமி ஹயக்ரீவருக்கு, நேற்று சிறப்பு வழிபாடு நடைபெற்றது.திருப்பூர் ஸ்ரீ வீரராகவப் பெருமாள் கோவில் வளாகத்தில் உள்ள, ஸ்ரீ லட்சுமி ஹயக்ரீவர் சன்னதியில், மாணவர் நலன் கருதி, ஆண்டு தோறும் சிறப்பு வழிபாடு நடத்தப்படுகிறது.மாணவர்களுக்கு நினைவாற்றலும், தன்னம்பிக்கையும், வெற்றியும் வழங்க வேண்டி, ஸ்ரீலட்சுமி ஹயக்ரீவருக்கு சிறப்பு அபிஷேகம் மற்றும் ஹோமம் நடத்தப்படுகிறது.

கடந்த வாரம், பிளஸ் 2 மாணவர்களுக்கான சிறப்பு வழிபாடு நடந்தது. நேற்று, பிளஸ் 2 மற்றும் பத்தாம் வகுப்பு பொதுத்தேர்வு எழுதவுள்ள மாணவ, மாணவியருக்கு, கூட்டு வழிபாடு நடந்தது. இதை முன்னிட்டு, காலை, 9:00 மணிக்கு சிறப்பு வேள்வி; 10:30 மணிக்கு, லட்சுமி ஹயக்கிரீவருக்கு திருமஞ்சனம்; 11:00 மணிக்கு நாம சங்கீர்த்தனம்; 11:30 மணிக்கு, சாத்துமறை மற்றும் மகா தீபாராதனை நடைபெற்றது.நேற்றைய வழிபாட்டில், திருப்பூர் சுற்றுப்பகுதிகளை சேர்ந்த, 1,000க்கும் அதிகமான மாணவ, மாணவியர்கள் பங்கேற்றனர். மாணவர் பெயர், நட்சத்திரம் பெயரில் அர்ச்சனை செய்து, பிரசாதம் வழங்கப்பட்டது. ஹயக்ரீவர் வழிபாட்டில் பங்கேற்ற மாணவர்களுக்கு, ஸ்ரீஹயக்ரீவர் திருவுருவப்படம் மற்றும் வழிபாட்டு மந்திரம் அச்சிடப்பட்ட அட்டை, திருமஞ்சனப்பொடி, குங்குமம், அர்ச்சனை மலர் ஆகியன வழங்கப்பட்டன.‘இங்க்’ பேனா, பென்சில், ரப்பர், ‘ஷார்ப்னர்’, ‘ஸ்கேல்’ வைக்கப்பட்ட பென்சில் பாக்ஸ், யாகத்தில் வைத்து வழிபாடு செய்யப்பட்டு, கையில் கட்டும் ரட்சையுடன்,

‘தினமலர்’ பட்டம் அச்சிடப்பட்ட பையில் வைத்து, பரிசாக வழங்கப்பட்டது. மாணவர்களுக்கு சாம்பார் சாதம், தயிர்சாதம் பிரசாதமாக வழங்கப்பட்டது. வரும், 25ல், பத்தாம் வகுப்பு மாணவர்களுக்கான சிறப்பு வழிபாடு நடைபெறவுள்ளது. மாணவர்களும், பெற்றோரும், ஸ்ரீஹயக்ரீவர் வழிபாட்டில் பங்கேற்று பயனடைய வேண்டும் என்று, திருவடி திருத்தொண்டு அறக்கட்டளை அழைப்பு விடுத்துள்ளது.