சாயல்குடி:சாயல்குடி அருகே பிள்ளையார்குளத்தில் 350 ஆண்டுகள் பழமைவாய்ந்த அரக்காசு அம்மா தர்காவில் கந்தூரி விழா நடந்தது.அக்.3ல் கொடியேற்றம் நடந்தது. உலக நன்மைக்காக மவுலீது எஸ்.முகம்மது இப்ராகீம் ஓதினார். நேற்று (அக்., 12ல்)காலை 9:00 மணி முதல் மதியம் 2:00 மணி வரை நேர்த்திகடன்களாக ஆட்டுக்கிடா, சேவல்கள் பலிபீடத்தில் பலியிடப் பட்டது.
அரக்காசு அம்மா தர்காவின் மக்பராவில் புனித சந்தனம் பூசி, பிறைவடிவ பச்சைப்போர்வை போர்த்தப்பட்டு, மல்லிகை சரங்களால் அலங்கரிக்கப்பட்டது.மாலை 5:00 மணி முதல் இரவு
11:00 மணி வரை 8 ஆயிரம் பேருக்கு கறிவிருந்து அன்னதானம் வழங்கப்பட்டது.
பிள்ளையார்குளம் விழா கமிட்டியாளர்கள் ராமகிருஷ்ணன், போஸ், கே.ராமர், முருகேசன் ஆகியோர் கூறியதாவது; சாயல்குடியை சுற்றுவட்டார கிராமங்களில் இருந்து ஏராளமான இந்துக்களும், முஸ்லிம்களும் தர்கா வழிபாட்டில் பங்குகொள்கின்றனர்.
புரட்டாசி வளர்பிறையில் வரும் வெள்ளிக்கிழமையில் மதநல்லிணக்க விழாவாக ஆண்டு தோறும் கொண்டாடி வருகிறோம். இந்து, முஸ்லிம் ஒற்றுமைக்கு எடுத்துக்காட்டாக
எங்கள் ஊர் விளங்கிவருவது பெருமையாக உள்ளது, என்றனர்