புதுச்சேரி : பஞ்சவடீ ஆஞ்ஜநேயர் கோவிலில் அனுமன் ஜெயந்தியை முன்னிட்டு காலை 8.30 மணிக்கு மூலவர் ஆஞ்ஜநேயருக்கு 2,000 லிட்டர் பால், பன்னீர், மஞ்சள் உள்ளிட்ட வாசனை திரவியங்களுடன் அபிஷேகம் நடைபெற்றது.

அனுமன் ஜெயந்தி விழா இன்று பஞ்சவடீ ஆஞ்ஜநேயர் கோவிலில் சிறப்பாக கொண்டாடப்பட்டது. திண்டிவனம் - புதுச்சேரி மெயின் ரோட்டில் உள்ள பஞ்சவடீ ஆஞ்ஜநேயர் கோவிலில் ஒவ்வொரு ஆண்டும் அனுமன் ஜெயந்தி சிறப்பாக கொண்டாடப்படுகிறது. இந்த ஆண்டு அனுமன் ஜெயந்தி விழா கடந்த 21ம் தேதி ஆரம்பமானது. பகவத் பிரார்த்தனை, அனுக்ஞை மகாசங்கல்பம், அங்குரார்ப்பணம், வாஸ்து சாந்தி நடைபெற்றது.

அதனைத் தொடர்ந்து தினசரி எஜமான சங்கல்பம், கும்பஸ்தாபனம், அக்னி மதனம், சாற்றுமுறை லட்சார்ச்சனை நடந்தது. நேற்று பஞ்சசூக்த ஹோமம், பூர்ணாஹூதி நடந்தது.இன்று 25ம் தேதி அனுமன் ஜெயந்தியை முன்னிட்டு காலை 8.30 மணிக்கு மூலவர் ஆஞ்ஜநேயருக்கு 2,000 லிட்டர் பால், பன்னீர், மஞ்சள் உள்ளிட்ட வாசனை திரவியங்களுடன் அபிஷேகம் நடைபெற்றது. பின்னர் ஆஞ்ஜநேயர் அலங்கரிக்கப்பட்டு மகா தீபாராதனை நடைபெற்றது. பக்தர்கள் அனைவருக்கும் காலை 10:00 மணி முதல் சிறப்பு அன்னதானம் வழங்கப்படுகிறது. மாலை 4:00 மணிக்கு சீதாராம திருக்கல்யாணம் நடக்கிறது. நிகழ்ச்சிக்கான ஏற்பாடுகளை பஞ்சமுக ஸ்ரீஜெயமாருதி சேவா டிரஸ்டியினர் செய்து வருகின்றனர்.