சபரிமலை: சபரிமலையில் நாளையும், நாளை மறுநாளும் (டிச., 26 மற்றும் 27ல்) நெய்ய பிஷேக நேரம் குறைகிறது.சபரிமலையில்  நாளை மறுநாள் மண்டலபூஜை நடைபெறுகிறது.  நாளை டிசம்., 26ல் சூரிய கிரகணம் வருவதால் நாளையும், நாளை மறுநாளும் தரிசன நேரம் மற்றும் நெய்யபிஷேக நேரம் குறைகிறது. நாளை அதிகாலை 3:00 மணிக்கு நடை திறந்து 3:15 மணிக்கு  துவங்கும் நெய்யபிஷேகம், காலை 6:45 மணியுடன் நிறைவு பெறும்.

அதன் பின்னர் கோயில் சுற்றுப்புறம் சுத்தம் செய்யப்பட்டு உஷபூஜை நடைபெறும். தொடர்ந்து 7:30 மணிக்கு நடை அடைக்கப்படும். கிரகணம் முடிந்து 11:30 மணிக்கு நடை திறந்த பின்னர் தந்திரி கண்டரரு மகேஷ் மோகனரரு புண்ணியாகம் நடத்துவார். தொடர்ந்து உச்ச பூஜை முடிந்து 1:45 மணிக்கு நடை அடைக்கப்படும்.

அதன் பின்னர் மாலை 5:00 மணிக்கு நடை திறந்து, தங்க அங்கி வந்து மாலை 6:30 மணிக்கு தீபாராதனை முடிந்த பின்னரே பக்தர்கள் தரிசனத்துக்கு அனுமதிக்கப்படுவர். வழக்கமாக 17 மணி நேரம் தரிசனம் நடைபெறும்.

நாளை 12 மணி நேரம் மட்டுமே தரிசனம்  நடைபெறும். நெய்யபிஷேக நேரம் ஐந்து மணி நேரமாக குறையும்.டிச. 27ல்  மண்டலபூஜை நாளில் அதிகாலை 3:15 மணிக்கு துவங்கும் நெய்யபிஷேகம், 9:30 மணிக்கு நிறைவு பெறும்.  இரவு 10:00 மணிக்கு நடை அடைக்கப்படும்.

மகரவிளக்கு சீசனுக்காக டிச.30ல்  நடை திறந்து டிச.31ல்  அதிகாலையில் நெய்யபிஷேகம் ஆரம்பமாகும்.

நவ., 16ல் தொடங்கிய மண்டலகாலத்தில் நேற்று டிசம்., 24ல் வரை 25 லட்சம் பக்தர்கள் தரிசனம் செய்துள்ளனர். வருமானம் 200 கோடியை நெருங்கியுள்ளது.