மோகனூர்: புனித செபஸ்தியார் தேர்த்திருவிழாவை முன்னிட்டு, நாளை (மே 8), மின் அலங்காரத் தேர்பவனி நடக்கிறது. மோகனூர், புதுத்தெருவில் புனித செபஸ்தியார் ஆலயம் அமைந்துள்ளது. இந்த ஆலயத்தில், ஆண்டுதோறும் தேர்த்திருவிழா வெகுவிமரிசையாக கொண்டாடப்படுவது வழக்கம். இந்த ஆண்டு விழா, நேற்று மாலை 6 மணிக்கு, எஸ்.பி.பி., காலனி பங்குதந்தை ஜெயசீலன் தலைமையில் கொடியேற்றம் மற்றும் திருப்பலியுடன் துவங்கியது. இன்று (மே 7) மாலை 6 மணிக்கு, பரமத்தி பங்குதந்தை பீட்டர் பிரான்சிஸ் தலைமையில், நவநாள் ஜெபமும், திருப்பலியும் நடக்கிறது. நாளை (மே 8) மாலை 6 மணிக்கு, நாமக்கல் மறைமாவட்ட முதன்மை குரு சவரி தலைமையில், திருவிழா திருப்பலி, இரவு 7 மணிக்கு பொங்கல் மந்திரிப்பு நிகழ்ச்சி நடக்கிறது. அதை தொடர்ந்து, இரவு 8 மணிக்கு ஆடம்பரத் தேர்பவனி நடக்கிறது. அலங்கரிக்கப்பட்ட தேரில் புனித செபஸ்தியார் எழுந்தருளி பவனி வந்து, பக்தர்களுக்கு ஆசீர் வழங்குகிறார். வழிநெடுகிலும் பக்தர்கள் புனிதருக்கு மாலை அணிவித்தும், மெழுகுவர்த்தி ஏற்றியும் வழிபடுகின்றனர். மே 9ம் தேதி காலை 7 மணிக்கு பங்குப்பணியாளர் மரிய பாக்கியம் தலைமையில், திருப்பலியும், கொடியிறக்கமும் நடக்கிறது. ஏற்பாடுகளை பங்குதந்தை, பங்கு மக்கள் செய்துள்ளனர்.