சென்னை : நம் நாளிதழ் செய்தியை அடுத்து, கோவில் பணியாளர்களுக்கு உடனடியாக சம்பளம் வழங்க, அறநிலையத்துறை கமிஷனர், பணீந்திர ரெட்டி உத்தரவிட்டுள்ளார். கோவில் பணியாளர்களுக்கு, அந்தந்த கோவில் நிர்வாகம் சார்பில், சம்பளம் வழங்கப்பட்டு வருகிறது.

கொரோனா வைரஸ் பரவலை தடுக்க, ஊரடங்கு உத்தரவு அமலில் உள்ளது. இதனால், நித்திய பூஜை நேரம் தவிர, மற்ற நேரங்களில் கோவில் நடை மூடப்பட்டுள்ளது; பக்தர்கள் தரிசனத்திற்கு தடை விதிக்கப்பட்டுள்ளது.ஊரடங்கால், கோவில் செயல் அலுவலர்கள் பணிக்கு வரவில்லை. இதனால், பணியாளர்களுக்கு சம்பளம் போடாததால், அவர்கள் ஒரு வேளை உணவுக்கு கூட வழியின்றி, தவித்து வருகின்றனர்.இது குறித்து, நேற்று முன்தினம், நம் நாளிதழில் செய்தி வெளியானது. இதை அடுத்து, கோவில் பணியாளர்களுக்கு, அவர்களின் வங்கி கணக்கில் பணம் செலுத்த, அறநிலையத்துறை கமிஷனர், பணீந்திர ரெட்டி உத்தரவிட்டுள்ளார். மேலும், அடுத்த மாதம் முதல், அனைத்து பணியாளர்களுக்கும், இ.சி.எஸ்., முறையில், வங்கி கணக்கில் சம்பளம் வழங்க, நடவடிக்கை எடுக்க உத்தரவிட்டுள்ளதாகவும், அறநிலையத்துறை வட்டாரங்கள் தெரிவிக்கின்றன.