ஊட்டி; தமிழ் புத்தாண்டு நிகழ்ச்சிகள் கோவில்களில் பக்தர்கள் கூட்டமின்றி அமைதியாக நடந்தது. ஆண்டுதோறும் தமிழ் புத்தாண்டு நிகழ்ச்சியையொட்டி, கோவில்களில் சிறப்பு பூஜை நடத்தப்படுகிறது.

நடப்பாண்டு கொரோனா நோய் தொற்றால், 144 தடை உத்தரவு அமலில் உள்ளது. கோவில்களில் சமூக இடைவெளி கடைப்பிடிக்கும் நோக்கில், பக்தர்களுக்கு அனுமதி மறுக்கப்பட்டு மாவட்டத்தில் பிரசித்தி பெற்ற கோவில்கள் நடை சாத்தப்பட்டது.கோவில் பூஜாரி தலைமையில் மட்டும் முக்கிய பூஜைகள் நடந்து வருகிறது. தமிழ் புத்தாண்டின் போது, பக்தர்கள் புடை சூழ சிறப்பு அலங்காரத்துடன் நடத்தப்படும், ஊட்டி மாரியம்மன் கோவில், மஞ்சூர் அன்னமலை முருகன் கோவில் உட்பட முக்கிய கோவில் விழாக்களை நடத்த முடியாத சூழல் ஏற்பட்டது. பக்தர்களின்றி கோவில் பூசாரி தலைமையில் மட்டும் சிறப்பு பூஜைகள் நடந்தது.

ஊட்டி மாரியம்மன் கோவில் முன், பக்தர்கள் வெளியே நின்று பூஜை செய்ய கூடினர். போலீசார் அங்கிருந்து செல்லுமாறு அறிவுறுத்தியபின்பு, அனைவரும் சென்றனர்.போலீசார் கூறுகையில், ஆண்டு தோறும், இதே நாளில், ஊட்டியில் மாரியம்மன் தேரோட்டம் நடப்பது வழக்கம். நடப்பாண்டு நடக்காத காரணத்தால், உள்ளூர் பக்தர்கள் காலை முதல் கோவில் முன் வந்து, தேங்காய் உடைத்து, பிரார்த்தனை செய்து வருகின்றனர். அவர்களை செல்லும் மாறு நாங்கள் அறிவுறுத்தி வருகிறோம், என்றனர்.