சென்னை: விநாயகர் சதுர்த்தியை ஒட்டி, பொது இடங்களில், விநாயகர் சிலைகள் அமைக்க, விழா கொண்டாட, ஊர்வலம் நடத்த, தமிழக அரசு தடை விதித்துள்ளது.

அரசு நேற்று வெளியிட்ட அறிவிப்பு: தமிழகத்தில், கொரோனா தொற்று பரவலை தடுக்க, பொது விழாக்களை தவிர்க்கவும், பொது இடங்களில், மக்கள் அதிகமாக கூடுவதை தவிர்க்கவும், அரசு பல்வேறு நடவடிக்கைகளை எடுத்து வருகிறது.

இந்நிலையில், வரும், 22ம் தேதி, விநாயகர் சதுர்த்தி பண்டிகை கொண்டாடப்பட உள்ளது. கொரோனா தொற்று பரவலை தடுக்கவும், பொது மக்கள் நலன் கருதியும், பொது இடங்களில், விநாயகர் சிலைகள் அமைக்க, சிலைகள் அமைத்து விழா கொண்டாட, தமிழக அரசு தடை விதித்துள்ளது.

அதேபோல, விநாயகர் சிலைகளை ஊர்வலமாக எடுத்துச் செல்வது, நீர் நிலைகளில் கரைப்பது போன்ற நிகழ்ச்சிகளை, ஊரடங்கு கட்டுப்பாடுகள் அமலில் உள்ள நிலையில், அனுமதிக்க இயலாது. எனவே, விநாயகர் சதுர்த்தி பண்டிகையை, அவரவர் வீடுகளிலேயே கொண்டாட வேண்டும். பண்டிகை கொண்டாட, தேவையான பொருட்களை வாங்க, கடைகளுக்கோ, சந்தை களுக்கோ செல்வோர், கண்டிப்பாக முக கவசம் அணிய வேண்டும்.

அனைத்து இடங்களிலும், சமூக இடைவெளியை முறையாக கடைப்பிடிக்க வேண்டும். சிறிய கோவில்களில் பொது மக்கள் வழிபட, ஏற்கனவே அரசு அனுமதி அளித்து உள்ளது. அந்தக் கோவில்களில் வழிபாடு செய்யும் போது, அரசு அறிவுறுத்தி உள்ள வழிகாட்டு நெறிமுறைகளை, கோவில் நிர்வாகமும், பொது மக்களும் தவறாமல் கடைப்பிடிக்க வேண்டும்.

வழிபாட்டு தலங்களுக்கும், பொது இடங்களுக்கும் செல்வோர், கண்டிப்பாக முக கவசம் அணிந்து, உரிய சமூக இடைவெளியை கடைப்பிடிக்க வேண்டும். இதற்கிடையில், பொது இடங்களில், விநாயகர் சிலை வைத்து வழிபாடு செய்ய, தடை விதித்துள்ளதை, தமிழக அரசு மறுபரிசீலனை செய்ய வேண்டும் என, இந்து தமிழர் கட்சி தலைவர் ராமரவிக்குமார் கோரிக்கை விடுத்து உள்ளார்.