சென்னை, : நம் நாளிதழ் செய்தி எதிரொலியாக, மானசரோவர், முத்திநாத் புனித யாத்திரை சென்றவர்கள், அரசு மானியம் பெற, விண்ணப்பிப்பதற்கான அவகாசம், வரும், 31ம் தேதி வரை நீட்டிக்கப்பட்டு உள்ளது.

சீனாவில் உள்ள மானசரோவர், நேபாளத்தில் உள்ள முக்திநாத் புனித தலங்களுக்கு, யாத்திரை சென்றவர்களுக்கு, மானியம் வழங்கும் திட்டத்தை, அறநிலையத்துறை ஆண்டுதோறும் செயல்படுத்தி வருகிறது. மானசரோவர் சென்றவர்களுக்கு தலா, 40 ஆயிரம் ரூபாய், முக்திநாத் பயணித்தவர்களுக்கு தலா, 10 ஆயிரம் ரூபாய் என, ஒவ்வொரு ஆண்டும், 4௦௦ பேருக்கு, அரசு மானியம் வழங்கப்படுகிறது.அதன்படி, மானசரோவர், முக்திநாத் தலங்களுக்கு, 2019 ஏப்ரல் முதல், இந்த ஆண்டு மார்ச், 31 வரை யாத்திரை சென்றவர்கள், மானியம் கோரி விண்ணப்பிக்க, ஏப்., 30 வரை அவகாசம் வழங்கப்பட்டது.

ஊரடங்கால், இந்த திட்டத்திற்கு தேவையான சான்றுகளுடன் விண்ணப்பிக்க முடியாமல், யாத்திரை சென்றவர்கள் தவித்து வந்தனர்.தற்போது, சீனாவுடனான எல்லை பிரச்னை, கொரோனா தொற்று போன்றவற்றால், இந்தாண்டு புனித யாத்திரை மேற்கொள்வதிலும் சிரமம் உள்ளது.எனவே, கடந்தாண்டு பயணித்தவர்கள், மானியம் கோரி விண்ணப்பிக்க, போதிய அவகாசம் அளிக்க வேண்டும் என்ற கோரிக்கை எழுந்தது.இது குறித்து, நம் நாளிதழில், சமீபத்தில், விரிவான செய்தி வெளியானது.இதையடுத்து, புனித யாத்திரை சென்றவர்கள், மானியம் பெற விண்ணப்பிக்கும் காலத்தை, வரும், 31ம் தேதி வரை நீட்டித்து, அறிநிலையத் துறை கமிஷனர் பிரபாகர் உத்தரவிட்டுள்ளார்.