கார்த்திகை 2, 3, 4ம் பாதம் : மார்கழி மாதத்தின் முதல் மூன்று வாரங்களில் நற்பலனையும், கடைசி வாரத்தில் சற்று சிரமத்தையும் எதிர்கொள்ள உள்ளீர்கள். உங்கள் நட்சத்திர அதிபதி சூரியன் எட்டில் அமர்ந்திருக்கும் நிலையில் ராசிநாதன் சுக்ரனும் ஜன.6 முதல் எட்டாம் வீட்டில் இணைவதால் நினைத்த காரியங்கள் எளிதில் முடிவிற்கு வராமல் தள்ளிப் போகும். ஜன. 6 முதல் 13 வரை நினைப்பது ஒன்றாகவும், நடப்பது ஒன்றாகவும் அமையும். இதனால் உங்கள் இயலாமையானது சுற்றி உள்ளோரிடம் கோபமாக வெளிப்படலாம். முக்கியமான பணிகளுக்கு குடும்பத்தினரை சார்ந்திருக்க வேண்டியிருக்கும். பண வரவு எதிர்பார்த்ததை விட குறைவாக இருக்கும். குடும்ப செலவுகளுக்கு பட்ஜெட் போட்டு சமாளிப்பீர்கள். சிறுசிறு விஷயங்களுக்கும் வீண்வாதம் செய்வீர்கள். உறவினர்கள் வழியில் புதிய கலகங்கள் தோன்றும். பிரயாணத்தின்போது தெரியாதவர்களோடு பழகுவதைத் தவிர்க்க வேண்டியது அவசியம். பிள்ளைகளின் பிடிவாதமான செயல்கள் லேசான மனக்கலக்கத்தைத் தரும். வாழ்க்கைத்துணையின் ஆலோசனைகளை ஏற்காமல் அவரோடு வீண் விவாதத்தில் ஈடுபடுவீர்கள். பூர்வீக சொத்துக்களில் வில்லங்க விவகாரங்கள் முளைக்கும். வேலை பார்ப்போர் அலுவலகத்தில் மேலதிகாரியோடு மோதல் போக்கினைக் காண நேரிடும். மாணவர்கள் உடன் படிக்கும் மாணவருக்கு உதவப்போய் சங்கடத்திற்கு ஆளாகலாம். மற்ற கிரகங்கள் சாதகமற்ற சூழலில் சஞ்சரித்தாலும் பிரதான கிரகங்களான குருவும் சனியும் சாதகமான பலன்களைத் தருவதால் நீங்கள் பெரிதாக கவலைப்பட வேண்டிய அவசியமில்லை. குருவின் பார்வை கூடுதல் பலத்தினைத் தரும். சனியின் பெயர்ச்சியும் உங்களுக்கு நன்மையைத் தரும். ஜென்ம ராசியில் ராகுவின் நீச பலம் சற்று அவசரத்தன்மையைத் தரும். நிதானம் தேவை என்பதோடு எச்சரிக்கையாகவும் செயல்பட வேண்டிய மாதம் இது.

ரோகிணி :  ஜன. 5 வரை ராசிநாதன் சுக்ரனின் பார்வை பலம் நேரடியாக ராசியின் மீது விழுவதால் சிறப்பாக செயல்பட்டு வருவீர்கள். பாக்ய ஸ்தானத்தின் வலிமை இந்த மாதத்தில் உங்கள் நிலையை உயர்த்துகிறது. எந்த ஒரு காரியத்திலும் முதலில் தடை உருவானாலும் உங்கள் முயற்சியால் தடைகளைத் தகர்த்து வெற்றி காண்பீர்கள். குடும்பத்தில் மகிழ்ச்சி நிலவும். தனலாபம் சிறப்பாக உள்ளதால் சேமிப்பு உயர்வடையும். கடன் பிரச்னை கொஞ்சம், கொஞ்சமாகக் குறையும். அண்டை வீட்டார் தங்கள் வீட்டுப் பிரச்னைக்கு உங்கள் உதவியை நாடி வருவர். உறவினரின் சந்திப்பு மனதிற்கு மகிழ்ச்சியைத் தரும். வீட்டிற்குத் தேவையான நவீன உபகரணங்களை வாங்குவீர்கள். டிச. இறுதி வாரத்தில் நெருங்கிய உறவினர் ஒருவர் உதவி கேட்டு வரக்கூடும். பிள்ளைகளின் செயல்களைப் புரிந்துகொள்வதில் தடுமாற்றம் காண்பீர்கள். இரும்பு சத்து நிறைந்த கீரை வகைகளை உணவில் சேர்த்துக் கொள்வது உடல்நலத்திற்கு நல்லது. தம்பதியராக இணைந்து செயல்படும் காரியங்களில் சிறப்பான வெற்றி கிட்டும். ஜன. 6 முதல் ஆடம்பர செலவுகள் அதிகரிப்பதாக உணர்வீர்கள். குடும்பப் பெரியவர்களின் ஆலோசனைகள் உங்கள் முன்னேற்றத்திற்கு வழிகாட்டும். பூர்வீக சொத்துக்களால் ஆதாயம் காண்பீர்கள். இந்த மாதத்தில் நிகழும் பெரிய மனிதர் ஒருவரின் சந்திப்பு உங்கள் வாழ்வினில் திருப்புமுனையை உண்டாக்கும். அலுவலகத்தில் கூடுதல் பொறுப்பினை சுமக்க நேரிடும். மாணவர்கள் நேரத்தைக் கடைபிடிப்பதில் கவனம் செலுத்த வேண்டும். முன்னேற்றம் காணும் மாதம் இது.