அரூர்: அரூர் அருகே, 10 ஆண்டுகளுக்கு பின் நிரம்பிய ஏரியில், அலங்க ரித்த தேரில், சுவாமிகளை வைத்து, கிராம மக்கள் தெப்ப தேரோட்டம் நடத்தினர்.

தர்மபுரி மாவட்டம், அரூர் அடுத்த சங்கிலிவாடியில் உள்ள ஏரி, சமீபத்தில் பெய்த மழையால், 10 ஆண்டுகளுக்கு பின் நிரம்பியது. இதையடுத்து, நேற்று, அலங்கரிக்கப்பட்ட தேரில், புதூர் மாரியம்மன்,  பாப்பார மாரியம்மன், கல்லூர் வேடியப்பன், முத்து வேடியப்பன் ஆகிய சுவாமிகள் மற்றும் நீர் நிரம்பிய கரகம் வைக்கப்பட்டு, சிறப்பு பூஜை செய்யப்பட்டு, ஏரியில் தெப்பத் தேரோட்டம் நடந்தது. பெண்கள்,  மாவிளக்கு எடுத்து அம்மனுக்கு பூஜை செய்தனர். முன்னதாக, ஆட்டுக்கிடாய் பலியிட்டனர். இதில், செல்லம்பட்டி, கோணம்பட்டி, செல்லம்பட்டி புதூர், சங்கிலிவாடி உள்ளிட்ட சுற்று வட்டார கிராமங்களை  சேர்ந்த மக்கள் கலந்து கொண்டனர்.

இது குறித்து கிராம மக்கள் கூறியதாவது: கடந்த காலங்களில், ஏரி நிரம்பும்போது, அலங்கரித்த தேரில், சுவாமிகளை வைத்து முன்னோர்கள் தெப்ப தேரோட்டம் நடத்தினர். இதனால், மழை பொழிந்து,  விவசாயம் செழிக்கும் என்பது ஐதீகமாக இருந்தது. இந்நிலையில், 10 ஆண்டு களுக்கு பின், ஏரி நிரம்பியதால், முன்னோர்கள் வழியில், நாங்களும் தெப்ப தேரோட்டம் நடத்தினோம். இவ்வாறு, அவர்கள்  கூறினர்.