திருவண்ணாமலை: திருவண்ணாமலை அருணாசலேஸ்வரர் கோவிலில், நேற்று மகா சிவராத்திரியை முன்னிட்டு லட்சார்ச்சனை விழா நடந்தது.

பிரம்மாவுக்கும், விஷ்ணுவுக்கும் யார்? பெரியவர் என்ற அகந்தையை ஒழித்து, ஜோதிப்பிழம்பாகவும், லிங்கோத்பவர் வடிவாகவும் காட்சி கொடுத்த நாள், மகா சிவராத்திரி. இதையொட்டி நேற்று, திருவண்ணாமலை அருணாசலேஸ்வரர் கோவிலில், அதிகாலை கோவிலில் நடை திறக்கப்பட்டு, அருணாசலேஸ்வரர், உண்ணாமுலையம்மன், மூலவர் மற்றும் உற்வச மூர்த்திகளுக்கு சிறப்பு அபிஷேகம் நடந்தது. தொடர்ந்து, அதிகாலை, 5:00 மணி முதல், மதியம், 2:00 மணி வரை, சுவாமி பெயருக்கு கோவில் நிர்வாகத்தின் சார்பில் லட்சார்ச்சனை நடந்தது. மகா சிவராத்திரியை முன்னிட்டு கோவில் வளாகம் வண்ண மலர்களாலும், வண்ண மின் விளக்குகளால் அலங்கரிக்கப்பட்டது. நள்ளிரவு நடக்கும் லிங்கோத்பவர் சன்னதி வண்ணமலர் தோரணங்களால் அலங்கரிக்கப்பட்டிருந்தது. ஆயிரக்கணக்கான பக்தர்கள் நீண்ட வரிசையில், காத்திருந்து, சுவாமி தரிசனம் செய்தனர். இரவு, 7:30 மணிக்கு, முதல்கால பூஜை, இரவு, 11:30 மணிக்கு, இரண்டாம்கால பூஜை, நள்ளிரவு, 12:00 மணிக்கு, சுவாமி மூல கருவறையின் பின்புறம் உள்ள லிங்கோத்பவருக்கு சிறப்பு அபிஷேகமும், இன்று 12ல், அதிகாலை, 2:30 மணிக்கு மூன்றாம் கால பூஜை, அதிகாலை, 4:30 மணிக்கு நடக்கும், நான்காம் கால பூஜைக்கான ஏற்பாடுகள் கோவில் நிர்வாகத்தின் சார்பில் செய்யப்பட்டது. கோவில் வளாகத்தில் கடந்த நான்காவது ஆண்டாக, லட்ச தீபம் ஏற்ற, கோவில் நிர்வாகம் தடை விதித்ததால், லட்ச தீபம் ஏற்ற முடியாமல் பக்தர்கள் ஏமாற்றமடைந்தனர்.