சென்னை: குத்தகை காலம் முடிந்த பின்னும் தனியார் தொண்டு நிறுவனம் வசம் இருந்த 32 கிரவுண்டு நிலம், அறநிலையத்துறை அமைச்சர் சேகர்பாபு முன்னிலையில் சுவாதீனம் எடுக்கப்பட்டது.

காஞ்சிபுரம், ஏகாம்பரநாதர் கோவிலுக்கு சொந்தமாக, பூந்தமல்லி நெடுஞ்சாலையில் 141 கிரவுண்டு இடம் உள்ளது. இதில், 44.5 கிரவுண்டு கலவலக் கண்ணன் செட்டி தொண்டு நிறுவனம் 99 ஆண்டுகள் குத்ததைக்கு எடுத்து, மேல்நிலைப் பள்ளியை நடத்தி வந்தது.இதில், 12.5 கிரவுண்டு 2010ல் கோவில் வசம் ஒப்படைக்கப்பட்டது. இந்நிலையில், குத்தகை காலம் முடிந்தது. இணை கமிஷனர் நீதிமன்றத்தில், சட்டப்பிரிவு 78ன் கீழ் சுவாதீன உத்தரவு பெறப்பட்டது.இதை எதிர்த்து, கலவலக் கண்ணன் செட்டி தொண்டு நிறுவனம் சார்பில் உயர் நீதிமன்றத்தில் வழக்கு தொடரப்பட்டது. அந்த வழக்கில் கோவிலுக்கு சாதகமாக தீர்ப்பு வந்தது.அதன் அடிப்படையில், அங்குள்ள பள்ளிக்கூடத்தை அந்த அமைப்பால் நடத்த முடியாத சூழல் ஏற்பட்டது. இதையடுத்து, 32 கிரவுண்டு இடம் மற்றும் பள்ளிக் கட்டடங்களை தொண்டு நிறுவனத்தினர், அறநிலையத்துறை அமைச்சர் சேகர்பாபு முன்னிலையில் கோவில் செயல் அலுவலரிடம் நேற்று முன்தினம் ஒப்படைத்தனர்.மேலும், கோவிலுக்கு சொந்தமான 96.5 கிரவுண்டு நிலத்தை அமைச்சர் பார்வையிட்டு, அவற்றை முழுமையாக கோவில் வசம் சுவாதீனம் எடுக்க நடவடிக்கை மேற்கொள்ளும்படி அலுவலர்களுக்கு உத்தரவிட்டார்.இந்நிகழ்வில், அறநிலையத்துறை செயலர் சந்திரமோகன், கமிஷனர் குமரகுருபரன் உள்ளிட்டோர் பங்கேற்றனர்.