பெரம்பலுார் : கங்கைகொண்ட சோழபுரம், மாளிகைமேட்டில் நடந்து வரும் அகழாய்வு பணியில், முதலாம் ராஜேந்திர சோழனால் கட்டப்பட்ட, அரண்மனையின் இரண்டாம் பாகம் கண்டுபிடிக்கப்பட்டுள்ளது.

தமிழக தொல்லியல் துறை மூலம், 2020-21 ஆண்டிற்கான அகழாய்வு பணிகளுக்கு, கடந்த ஆட்சியில் நிதி ஒதுக்கப்பட்டு பணிகள் துவங்கின. அதன்படி, தமிழகம் முழுதும் கீழடி, ஆதிச்சநல்லுார், கங்கைகொண்டசோழபுரம் உள்ளிட்ட ஏழு மாவட்டங்களில் அகழாய்வு பணிகள் நடந்து வருகின்றன.அரியலுார் மாவட்டம், கங்கைகொண்ட சோழபுரம் அருகில் அமைந்துள்ள மாளிகைமேடு என்னும் பகுதியில், கடந்த மார்ச் மாதம் முதற்கட்ட அகழாய்வு பணிகள் துவங்கி நடந்து வருகிறது.கொரோனா இரண்டாம் அலை ஊரடங்கு காரணமாக அகழாய்வுப் பணிகள் கடந்த மாதம் நிறுத்தப்பட்டது. தற்போது, ஊரடங்கு தளர்வு காரணமாக கடந்த, 14ம் தேதி முதல் அகழாய்வுப் பணிகள் மீண்டும் தொடங்கியது.

மாளிகை மேட்டில் நடந்த அகழாய்வு பணிகளில், ஏற்கனவே கூரை ஓடுகள், பானை ஓடுகள், இரும்பிலான ஆணிகள், சீன கலைநயமிக்க மணிகள் போன்ற பொருட்கள் கிடைத்து, தொல்லியல் துறையினரால் சேகரித்து வைக்கப்பட்டுள்ளன.முதலாம் ராஜேந்திர சோழனால் கட்டப்பட்ட அரண்மனையின் ஒரு பாகத்தின் சுற்றுச்சுவர் கடந்த மாதம் தென்பட்டது. தற்போது மீண்டும் அகழாய்வுப் பணிகள் துவங்கிய நிலையில் அரண்மனையின் இரண்டாவது பாகமும் கண்டறியப்பட்டுள்ளது.

முதலாம் ராஜேந்திர சோழன் ஆட்சிக்காலத்தில் மாளிகைமேடு என்னும் பகுதியில் தான் அரண்மனை அமைத்து இருந்ததாக வரலாற்றுக் குறிப்புகள் கூறுகின்றன. அந்த வகையில் தற்போது அரண்மனையின் இரண்டாவது பாகம் கிடைக்கப் பெற்று இருப்பது, சோழர்களின் வரலாற்று சுவடுகளை உறுதி செய்கின்றன என்றும், சோழர்களின் வரலாற்று அரிய பொக்கிஷங்கள் இன்னும் கிடைக்க வாய்ப்பு இருப்பதாகவும் தொல்லியல் துறையினர் தெரிவிக்கின்றனர்.