காங்கேயம்: சிவன்மலை ஆண்டவர் உத்தரவு பெட்டியில், பச்சை வேட்டி துண்டு, வெள்ளை சட்டை, மதிப்பிழந்த ரூ.500 நோட்டு இரண்டு, ரூ.5, ரூ.2, ரூ.1, ராசி கட்டங்கள், தேங்காய், எழுமிச்சை, வெற்றிலை பாக்கு, பூ வைத்து நேற்று முதல் பூஜை செய்யப்பட்டு வருகிறது.

திருப்பூர் மாவட்டம், காங்கேயம் அடுத்துள்ள சிவன்மலை சுப்ரமணியசுவாமி கோவில் அருணகிரிநாதரால் பாடல் பெற்றது. சிவன்மலை கோவில் சிறப்புகளில் பிரசித்தி பெற்றது ஆண்டவன் உத்தரவு பெட்டியாகும். நாட்டில் ஏற்படும் இன்னல்கள், மகிழ்ச்சிகளை முன்னதாகவே உணர்த்துவதால், மூலவருக்கு காரணமூர்த்தி என்ற பெயர் உள்ளது. சிவன்மலை ஆண்டவர் பக்தர்களின் கனவில் வந்து, குறிப்பால் உணர்த்தி அது சம்மந்தமான பொருட்களை உத்தரவு பெட்டியில் வைப்பது தொன்று தொட்டு வழங்கி வருகிறது. பக்தர்கள் கனவில் தோன்றி கூறிய பொருளை பக்தர்கள் கொண்டு வந்தால், மேற்படி பொருளை உத்தரவு பெட்டியில் வைக்கலாமா என சுவாமியிடம் அர்ச்சகர்கள் வெள்ளை மற்றும் சிவப்பு பூ வைத்து உத்தரவு கேட்பர். வெள்ளை பூ விழுந்து அனுமதி கிடைத்தால் ஏற்கனவே உள்ள பொருள் மாற்றப்படுகிறது. இதுவரை இங்கு  மண், துப்பாக்கி, ஏர் கலப்பை, ரூபாய் நோட்டு,நோட்டு புத்தகம், சைக்கிள், அரிசி, மஞ்சள், இளநீர், தங்கம் சர்க்கரை, கணக்கு நோட்டு, பூமாலை, இருப்பு சங்கிலி, ருத்தரட்சம் என பல்வேறு பொருட்கள் வைத்து பூஜை செய்யப்பட்டுள்ளது அவ்வாறு வைத்து பூஜை செய்யப்படும் பொருள் சமுதாயத்தில் ஒரு தாக்கத்தை ஏற்படுத்தி வந்திருக்கிறது.

கடந்த ஜூலை மாதம் 10 ம் தேதி முதல் 10ரூபாய் நாணயம், ஆதார் கார்டு மற்றும் பஞ்சங்கத்துடன் சிறு மணியும் வைத்து சிறப்பு பூஜை செய்யப்பட்டது. இந்நிலையில் திருப்பூர் மாவட்டம், காங்கேயம் வட்டம், முத்தூர் வேலம்பாளையத்தை சேர்ந்த கோகுல்ராஜ்(35) என்பவரின் கனவில் பச்சை வேட்டி துண்டு, வெள்ளை சட்டை, மதிப்பிழந்த ரூ.500 நோட்டு இரண்டு, ரூ.5, ரூ.2, ரூ.1, ராசி கட்டங்கள், தேங்காய், எழுமிச்சை, வெற்றிலை பாக்கு, பூ வைத்து  பூஜை செய்ய உத்திரவானது. இதையடுத்து ஆண்டவன் உத்தரவு பெட்டியில் இன்று முதல் வைத்து பூஜை செய்யப்படுகிறது. இதுபற்றி கோவில் சிவாச்சியர் ஒருவர் கூறியதாவது:  சிவன்மலை ஆண்டவர் உத்தரவு பெட்டியில் எந்த பொருள் வைத்து பூஜை செய்யப்படுகிறதே அந்த பொருள் சமுதாயத்தில் ஏதாவது ஒரு வகையில் தாக்கத்தை ஏற்படுத்தும். இதன் தாக்கம் போக போக தான் தெரியவரும், இவ்வாறு அவர் தெரிவித்தார்.