மகான் நாராயண தீர்த்தருக்கு கிருஷ்ணராக காட்சியளித்த பெருமாள் தஞ்சாவூர் அருகிலுள்ள வரகூரில் குடியிருக்கிறார். குழந்தை வரம் பெற இவருக்கு வெள்ளிக்காப்பு காணிக்கை செலுத்துகின்றனர்.    
நாராயணதீர்த்தர் என்னும் மகான் வயிற்றுவலியால் அவதிப்பட்டு வந்தார். கனவில் தோன்றிய பெருமாள், ‘‘காலை எழுந்ததும் யார் உன் கண்ணில் படுகிறாரோ அவரை பின் தொடர்ந்து செல். வயிற்றுவலி தீரும்’’ என தெரிவித்தார். மறுநாள் காலையில் வெள்ளைப்பன்றி (வராகம்) ஒன்று கண்ணில் பட்டது. தீர்த்தரும் அதை பின்தொடர, அது இத்தலத்திலுள்ள லட்சுமி நாராயணப் பெருமாள் கோயிலுக்குள் சென்று மறைந்தது. இங்கு வழிபட்ட தீர்த்தருக்கு வயிற்றுவலி மறைந்தது. வராக வடிவில் காட்சியளித்ததால் இத்தலம் ‘வரகூர்’ எனப்பட்டது. பழமையான இக்கோயில் முதலாம் பராந்தகச் சோழனால் கட்டப்பட்டது.
 ஒருமுறை கிருஷ்ணர் காட்சியளித்த போது அவருடன் வந்த சத்தியபாமா, ‘‘ தீர்த்தரே! கிருஷ்ணாவதாரத்தில் கோபியருடன் நடத்திய திருவிளையாடலை கீர்த்தனையாக பாடுவீராக’’ என கட்டளையிட்டார். தீர்த்தரும் ‘ஸ்ரீகிருஷ்ணலீலா தரங்கிணி’ என்னும் பெயரில் கீர்த்தனைகள் பாடினார். நாராயண கவிராயர் என்பவர் ‘ஸ்ரீகிருஷ்ண சிக்யோத்ஸவம்’ என்னும் பாடலை இங்கு பாடினார். ‘சிக்யோத்ஸவம்’ என்பதற்கு ‘உறியடி திருவிழா’ என்பது பொருள்.
 இங்குள்ள மூலவரின் பெயர் லட்சுமி நாராயணர். உற்ஸவர் பெயர் வெங்கடேசப் பெருமாள். துளசி, ஏலக்காய், பச்சைக் கற்பூரம், கிராம்பு, ஜாதிக்காய் கலந்த பொடியை பிரசாதமாக தருகின்றனர். உடல் நலம் பெற பக்தர்கள் இதைச் சாப்பிடுகின்றனர்.  
 குழந்தை வரம் வேண்டுபவர்கள் மூலவரின் பாதத்தில் வைத்து பூஜித்த வெள்ளிக்காப்பை அணிகின்றனர். குழந்தை பிறந்ததும் காணிக்கையாக அதை செலுத்துகின்றனர். நினைத்தது நிறைவேற அங்கப்பிரதட்சணம் செய்வதோடு, பெருமாளின் கையிலுள்ள வெள்ளிக்குடத்தில் வெண்ணெய் நிரப்புகின்றனர். கிருஷ்ண ஜெயந்தியன்று ‘கிருஷ்ண லீலா தரங்கிணி’ பாடல்களை பக்தர்கள் பாடி வழிபடுகின்றனர்.    
எப்படி செல்வது?
தஞ்சாவூர்– திருவையாறு சாலையில் 10 கி.மீ துாரத்தில் கண்டியூர். அங்கிருந்து நடுக்காவேரி சாலையில் 13 கி.மீ.,