திருச்சி: ஸ்ரீரங்கம் அரங்கநாதசுவாமி கோயிலில் கடந்த 03.12.2021 அன்று தொடங்கிய வைகுண்ட ஏகாதசிப் பெருவிழா வருகின்ற 24.12.2021 வரை நடைபெறுகிறது. இத் திருவிழாவின் முக்கிய திருநாளான 14-12-2021 (செவ்வாய் கிழமை) வைகுந்த ஏகாதசியன்று மூலஸ்தானத்தில் இருந்து அதிகாலை 03.30 மணிக்கு தொடங்கும் ஸ்ரீநம்பெருமாள் புறப்பாடு அதிகாலை 04.45 மணிக்கு பரமபதவாசல் திறக்கப்பட்டு, அதன்வழியாக முறைப்படியான சம்பிரதாயங்களைக் கடந்து திருமாமணி ஆஸ்தான மண்டபம் என்று சொல்லப்படுகின்ற ஆயிரங்கால் மண்டபத்திற்கு காலை 07.00 மணிக்கு வருகை தந்து முறைப்படியான பூஜைகள் நடைபெறுகிறது.

கடந்த ஆண்டைப் போலவே இந்த ஆண்டும் கோவிட்-19 நோய்த் தொற்று பரவலைத் தடுக்கும் விதமாக அரசு வழிகாட்டு நெறிமுறைகளை பின்பற்றி இத்திருவிழாவிற்க்கு பக்தர்கள் 14.12.2021 அன்று கீழ்காணும் விவரப்படி அனுமதிக்கப்படுகிறார்கள்.

* மூலவர் அரங்கநாதர் தரிசனம் காலை 07.00 மணி முதல் இரவு 08.00 மணி வரை
* உற்சவர் ஸ்ரீநம்பெருமாள் தரிசனம் காலை 07.00 மணி முதல் இரவு 10.00 மணி வரை