திருவாரூர்: ஞானபுரீ ஸ்ரீ சங்கடஹர மங்கல மாருதி கோவிலில் அனுமன் ஜெயந்தியை முன்னிட்டு விஸ்வரூப ஆஞ்சநேயருக்கு பல்வேறு சிறப்பு அலங்காரம் செய்யப்பட்டு இருந்தது. அதனை திரளான பக்தர்கள் கண்டு தரிசனம் செய்தனர்.

ஞானபுரீ விஸ்வரூப ஆஞ்சநேயர் கோவிலில் மார்கழி அமாவாசை மூல நட்சத்திரம் கூடிய ஜனவரி 2-ஆம் நாளான இன்று அனுமன் ஜெயந்தி விழா வெகு விமர்சையாக நடைபெற்றது. அதனை முன்னிட்டு ஆஞ்சநேயர் சுவாமி பச்சை பட்டு உடுத்தி சிறப்பு அலங்காரத்துடன் பக்தர்களுக்கு அருள்பாலித்தார். ஆஞ்சநேயர் சுவாமிக்கு ஸ்ரீ ஸ்ரீ கிருஷ்ணானந்த தீர்த்த மஹாஸ்வாமிகளின் முன்னிலையில் சிறப்பு ஆராதனைகள் நடைபெற்றது. தொடர்ந்து காலை 8 மணி முதல் மகா சுவாமிகள் முன்னிலையில் கோவில் மண்டபத்தில் நூற்றுக்கும் மேற்பட்ட இசைக் கலைஞர்கள் பங்கேற்று பஞ்சரத்ன கீர்த்தனைகள் பாடி சுவாமியை ஆராதனை செய்யும் நிகழ்வும், மாலை வெள்ளித்தேர் உலாவும் நடைபெறுகிறது. இன்று கோவிலுக்கு வரும் பக்தர்கள் அனைவருக்கும் பூஜிக்கப்பட்ட ஒரு ரூபாய் நாணயம் பிரசாதமாக வழங்கப் பட உள்ளது. இந்த அனுமன் ஜெயந்தி விழாவில் பக்தர்கள் அனைவரும் கலந்து கொண்டு ஆஞ்சநேயர் பகவானின் திருவருளையும், மஹாஸ்வாமிகளின் குருவருளையும் பெற வேண்டுமாய் கோவில் நிர்வாகம் சார்பில் கேட்டுக் கொள்ளப்பட்டுள்ளது. விழாவிற்கான ஏற்பாடுகளை கோவில் தர்மாதிகாரி ரமணி அண்ணா, திருமடத்தின் ஸ்ரீகாரியம் சந்திரமவுலீஸ்வரர் மற்றும் அறங்காவலர் ஜெகன்நாதன் ஆகியோர் செய்து வருகின்றனர்.