மேட்டுப்பாளையம்: காரமடை அரங்கநாதர் கோவிலில், வைகுண்ட ஏகாதசி விழா, பகல் பத்து உற்சவம் தொடங்கியது.

கோவை மாவட்டத்தில், வைணவ ஸ்தலங்களில், மிகவும் பிரசித்தி பெற்றது, காரமடை அரங்கநாதர் கோவிலாகும். இங்கு வைகுண்ட ஏகாதசியை முன்னிட்டு, இன்று காலை நடை திறந்து மூலவருக்கு சிறப்பு திருமஞ்சனம் முடிந்து, காலை, 9:00 மணிக்கு காலசந்தி பூஜை முடிந்தது. அரங்கநாத பெருமாள், வெள்ளி சப்பரத்தில், வெண்பட்டு குடைசூழ, மங்கள வாத்தியம் முழங்க, திருக்கோவில் வலம் வந்து ரங்க மண்டபத்தில் எழுந்தருளினார். அதன்பிறகு திருமங்கையாழ்வார், நம்மாழ்வார், ராமானுஜர் ஆகிய உற்சவ மூர்த்திகள் அரங்கநாத பெருமாள் முன்பு எழுந்தருளினர். அவர்களுக்கு மாலை, மரியாதை, பரிவட்டம் அளிக்கப்பட்டது.

அதைத்தொடர்ந்து பகல் பத்து உற்சவம் தொடங்கியது. கோவில் ஸ்தலதார்கள் வேத வியாச ஸ்ரீதர் பட்டர் திருமலை நல்லான் சக்கரவர்த்தி, தமிழ் வேதமாகிய ஆழ்வார்கள் அருளிய திவ்ய பிரபந்தத்தில், திருப்பல்லாண்டு, திருநெடுந்தாண்டகம், திருக்குறுந்தாண்டகம், பெருமாள் திருமொழி மற்றும் பெரிய திருமொழி திவ்ய பிரபந்த பாசுரங்களை, அரங்கநாதப் பெருமாள் முன்பு சேவித்தனர். இந்நிகழ்ச்சியில் கோவில் அர்ச்சகர்கள் சுரேஷ் நாராயணன், திருவேங்கடம், ஹரி ராஜா, ராமகிருஷ்ணன் ஆகியோர் மந்திர புஷ்பம், வேதம், அஷ்டோத்திரம் ஆகியவற்றை செய்வித்தனர். அதைத்தொடர்ந்து மகா தீபாராதனை நடந்தது இந்நிகழ்ச்சியில் செயல் அலுவலர் லோகநாதன், மிராசுதாரர்கள் ஆகியோர் பங்கேற்றனர்.