சென்னை : கோவை ஈஷா யோகா மையத்தில், சுற்றுச்சூழல் அனுமதி பெறாமல், கட்டுமானங்கள் மேற்கொண்டதாக அனுப்பிய, நோட்டீஸ் மீது, நடவடிக்கை எடுக்கக் கூடாது என, சென்னை உயர் நீதிமன்றம் உத்தரவிட்டுள்ளது. கோவை ஈஷா அறக்கட்டளை சி.ஆர்.தினேஷ் ராஜா, சென்னை உயர் நீதிமன்றத்தில் தாக்கல் செய்த மனு:ஈஷா அறக்கட்டளை வளாகத்தில், 2006 முதல் 2012ம் ஆண்டு வரை, 91 ஆயிரத்து 519 சதுர மீட்டர் அளவிற்கு கட்டடங்கள் கட்டப்பட்டு, உண்டு உறைவிடப் பள்ளி, யோகா பள்ளி ஆகியவை செயல்பட்டு வந்தன.

கடந்த 2006ம் ஆண்டு, சுற்றுச்சூழல் தாக்க மதிப்பீட்டு விதிகளின் படி, அனுமதி பெறாமல் கட்டப்பட்டுள்ளதாக கூறி, இனிமேல் கட்டுமானங்களை மேற்கொள்ளக் கூடாது என உத்தரவிடப்பட்டது. அதன்பின், 2014ல் பிறப்பிக்கப்பட்ட விதிகளின் படி, கல்வி நிலையங்கள் என்ற அடிப்படையில், விலக்கு கோரி மனு கொடுக்கப்பட்டது.  கடந்த 2014க்கு முன் மற்றும் பின் என, கட்டடங்களை இரு வகையாக பிரித்ததாகவும், கல்வி நிறுவனம் என்ற அடிப்படையில் சுற்றுச்சூழல் துறை அனுமதி தேவையில்லை எனவும், விலக்கு கோரி விண்ணப்பித்திருந்தோம். ஆனால், 2021 நவம்பர் 19ம் தேதி, விதிமீறல் கட்டடங்கள் கட்டியதற்காக, ஏன் வழக்கு தொடரக் கூடாது என விளக்கம் கேட்டு, மாசு கட்டுப்பாட்டு வாரியம், மாவட்ட சுற்றுச்சூழல் இன்ஜினியர் நோட்டீஸ் அனுப்பியுள்ளார். எங்கள் மையத்திற்கு எதிரான நோட்டீசுக்கு தடை விதித்து, அறிவிப்பாணையை ரத்து செய்ய வேண்டும்.இவ்வாறு அதில் கூறப்பட்டது.இந்த வழக்கு, பொறுப்பு தலைமை நீதிபதி முனீஷ்வர் நாத் பண்டாரி மற்றும் நீதிபதி ஆதிகேசவலு அமர்வு முன் விசாரணைக்கு வந்தது. அப்போது, சம்பந்தபட்ட நீதிமன்றத்தில், ஏற்கனவே புகார் மனு தாக்கல் செய்யப்பட்டுள்ளது என, அரசு தரப்பில் தெரிவிக்கப்பட்டது. அப்போது, 2014ம் ஆண்டு பிறப்பிக்கப்பட்ட அறிவிப்பாணையில், முன் தேதியிட்டு அமல்படுத்துவதாகக் குறிப்பிடப்படாத நிலையில், அதற்கு முன் கட்டப்பட்ட கட்டடங்கள் மீது, எவ்வாறு நடவடிக்கை எடுக்கப்படும் என, நீதிபதிகள் கேள்வி எழுப்பினர். வழக்கு தொடர்பாக, மத்திய, மாநில அரசுகள் பதிலளிக்க உத்தரவிட்டு விசாரணையை, இரண்டு வாரங்களுக்கு நீதிபதிகள் தள்ளி வைத்தனர். அதுவரை, ஈஷா யோகா மையத்திற்கு எதிரான நோட்டீஸ் மீது, மேல் நடவடிக்கை எடுக்கக் கூடாது என, இடைக்கால உத்தரவு பிறப்பித்தனர்.