திருக்கோவிலூர்: திருக்கோவிலூர் உலகளந்த பெருமாள் கோவிலில் பக்தர்கள் கோவிந்தா கோஷம் முழங்க பெருமாள் பரமபதவாசல் வழியாக எழுந்தருளி பக்தர்களுக்கு அருள்பாலித்தார்.

நடு நாட்டு திருப்பதி என போற்றப்படும் 108 திவ்ய தேசங்களில் ஒன்றான, திருக்கோவிலூர் உலகளந்த பெருமாள் கோவிலில் இன்று காலை 5:40 மணிக்கு சொர்க்கவாசல் திறக்கப்பட்டது. முன்னதாக அதிகாலை 4:30 மணிக்கு மூலவர் பெருமாள் முத்தங்கி சேவையில் விஸ்வரூப தரிசனம், திருப்பாவை சாற்றுமறை, ஸ்ரீதேவி பூதேவி சமேத தேகளீசபெருமாள் வைரகிரீடம் அணிந்து சிறப்பு அலங்காரத்தில் மூலஸ்தானத்திலிருந்து புறப்பட்டார். கோவிலை வலம் வந்து, உடையவர் சன்னதிக்கு வந்தடைந்தார். அங்கு மண்டகப்படி, பரமபத வாசலுக்கு சிறப்பு பூஜைகளுடன் கோவிந்தா கோஷம் முழங்க 5:40 மணிக்கு சொர்க்கவாசல் திறக்கப்பட்டது. தொடர்ந்து சுவாமி பரமபத மண்டபத்தில் எழுந்தருளி, நம்மாழ்வார் மங்களாசாசனம் நடந்தது. ஜீயர் ஸ்ரீதேகளீச ராமானுஜாச்சாரிய சுவாமிகள் தலைமையில், கோவில் ஏஜென்ட் கோலாகலன் ஏற்பாட்டில், காலை 6:30 மணிக்கு மேல் டி.எஸ்.பி., கங்காதரன் மேற்பார்வையில் பக்தர்கள் முகக் கவசம், தனிமனித இடைவெளி உள்ளிட்ட பெருந்தொற்று தடுப்பு முன்னெச்சரிக்கை நடவடிக்கையுடன் சுவாமி தரிசனத்துக்கு அனுமதிக்கப்பட்டனர். இதில் ஏராளமான பக்தர்கள் நீண்ட வரிசையில் காத்திருந்து சுவாமி தரிசனம் செய்தனர்.