வடவள்ளி: மருதமலை சுப்பிரமணியசுவாமி கோவிலில், வைகாசி விசாகத்தையொட்டி ஏராளமான பக்தர்கள் குவிந்தனர்.

முருகனின் ஏழாம் படை வீடாக மருதமலை சுப்பிரமணியசுவாமி கோவில் கருதப்படுகிறது. இக்கோவிலில் ஆண்டுதோறும், கந்த சஷ்டி திருவிழா, தைப்பூசத்திருவிழா, வைகாசி விசாகம் வெகு சிறப்பாக கொண்டாடப்படும். இக்கோவிலுக்கு நாள்தோறும் பல்வேறு பகுதிகளில் இருந்தும் ஆயிரக்கணக்கான பக்தர்கள் வந்து செல்கின்றனர். இந்நிலையில், வைகாசி விசாகத்தை ஒட்டி நேற்று அதிகாலை, 5:00 மணிக்கு, மங்கல வாத்தியங்களுடன் கோமாதா பூஜையுடன் நடை திறக்கப்பட்டது. அதன்பின், 6:00 மணிக்கு, சுப்பிரமணிய சுவாமிக்கு, பால், சந்தனம், தயிர், நெய் உள்ளிட்ட திரவங்களால் சிறப்பு அபிஷேகம் செய்யப்பட்டது. காலையில், சுப்பிரமணிய சுவாமி, வெள்ளி கவசத்திலும், மாலையில், ராஜ அலங்காரத்திலும் பக்தர்களுக்கு காட்சியளித்தார்.

உற்சவ மூர்த்திகளான, சுப்பிரமணிய சுவாமி, வள்ளி, தெய்வானை சமேதராய், ரத்தின அங்கி அலங்காரத்தில், தங்கமயில் வாகனத்தில் எழுந்தருளி, திருவீதியுலா வந்து பக்தர்களுக்கு அருள்பாலித்தார். வைகாசி விசாகத்தைஒட்டி, ஏராளமான பக்தர்கள், பால் காவடி மற்றும் பால் குடங்கள் எடுத்து வந்தனர். மாலை, 6:00 மணிக்கு, வள்ளி, தெய்வானை சமேத சுப்பிரமணிய சுவாமி, தங்க தேரில் எழுந்தருளி திருவீதி உலா வந்தனர். வைகாசி விசாகத்தை ஒட்டி, மருதமலையில் நேற்று, 10 ஆயிரத்திற்கும் மேற்பட்ட பக்தர்கள், சுவாமி தரிசனம் செய்தனர். இதனால், அடிவாரத்தில் வாகனங்கள் நீண்ட வரிசையில் காத்திருந்தன. ஏராளமான பக்தர்கள் குவிந்ததால், போலீசார் பாதுகாப்பு பணியில் ஈடுபட்டனர்.