பொள்ளாச்சி சுற்றுப்பகுதிகளிலுள்ள கோவில்களில், பிரதோஷத்தை முன்னிட்டு சிறப்பு பூஜைகள் நடந்தன.ஆனிமாத இரண்டாவது பிரதோஷ பூஜை முன்னிட்டு, பொள்ளாச்சி, டி.கோட்டாம்பட்டி ஸ்ரீதேவி பூதேவி சமேத வரதராஜப் பெருமாள் கோவிலில், பால், இளநீர், தயிர், அரிசி, திருமஞ்சன பொடி உட்பட ஒன்பது வகையான பொருட்களால் அபிஷேகம் நடந்தது.ஜோதிநகர் விசாலாட்சியம்மன் உடனமர் ஜோதிலிங்கேஸ்வரர் கோவிலில், சிறப்பு அலங்காரம் மற்றும் அபிஷேகம் நடந்தது. திப்பம்பட்டி சிவசக்தி கோவிலில், சக்தி தேவியுடன் மலையாண்டீஸ்வரர் சிறப்பு அலங்காரத்தில் பக்தர்களுக்கு அருள்பாலித்தார். மாகாளியம்மன் கோவிலில், ருத்ரலிங்கேஸ்வரருக்கு சிறப்பு அலங்காரம் நடந்தது. சுவாமிக்கு சிறப்பு அபிஷேகம், ஆராதனை நடந்தது. கோவில்பாளையம் காளியண்ணன்புதுார் மீனாட்சியம்மன் உடனமர் சுந்தரேஸ்வரர் கோவிலில், சிறப்பு அலங்காரம், அபிஷேகம் நடந்தது. கோவில்களில் நடந்த பிரதோஷ வழிபாட்டில் பக்தர்கள் பங்கேற்றனர். - நிருபர் குழு -

வால்பாறை: வால்பாறை சுப்ரமணிய சுவாமி கோவில் சன்னதியில் எழுந்தருளியுள்ள, காசிவிஸ்வநாதருக்கு நேற்று பிரதோஷ பூஜையில், மாலை, 5:00 மணிக்கு பால், தயிர், மஞ்சள், இளநீர், பன்னீர், தேன், திருநீறு உள்ளிட்ட, 16 வகையான அபிேஷக பூஜை நடந்தது. மாலை, 6:15 மணிக்கு சிறப்பு அலங்கார பூஜை நடந்தது.காசிவிஸ்வநாதர் தேவியருடன் தேரில் எழுந்தருளி, கோவிலை வலம் வந்து பக்தர்களுக்கு அருள்பாலித்தார். பிரதோஷ பூஜையில் கலந்து கொண்ட பக்தர்களுக்கு பிரசாதம் வழங்கப்பட்டது.

உடுமலை: உடுமலை காந்திநகரில் வரசித்தி விநாயகர் கோவிலில் பிரதோஷத்தையொட்டி, சிறப்பு பூஜைகள் நடந்தன. நந்திபகவான் சிறப்பு அலங்காரத்தில் பக்தர்களுக்கு அருள்பாலித்தார். உடுமலை ரத்தினாம்பிகை உடனுறை ரத்தின லிங்கேஸ்வரர் கோவிலில், சிறப்பு அலங்காரம், பூஜைகள் நடந்தன. நந்திபகவான் சிறப்பு அலங்காரத்தில் அருள்பாலித்தார்.அமராவதிநகர் சித்தி விநாயகர் கோவிலில், சிறப்பு அலங்காரத்தில், அருள்பாலித்த சதாசிவ லிங்கேஸ்வரர் மற்றும் நந்திபகவானை பக்தர்கள் தரிசனம் செய்தனர். இதேபோல், கடத்துார் அர்ச்சுனேஸ்வரர் கோவில், கொமரலிங்கம் காசிவிஸ்வநாதர் கோவில், ஏரிப்பாளையம் சித்தாண்டீஸ்வரர் கோவில்களில் சிறப்பு பூஜைகள் நடந்தன.