ஆர்.எஸ்.மங்கலம்: ஆர்.எஸ்.மங்கலம் அருகே உப்பூர் வெயிலுகந்த விநாயகருக்கு, இரு தேவியருடன் நடைபெற்ற திருக்கல்யாணத்திலும், விநாயகர் இரு தேவியருடன் திருமண கோலத்தில் நடைபெற்ற ஊர்வலத்திலும் ஏராளமான பக்தர்கள் கலந்து கொண்டு தரிசனம் செய்தனர்.

ராமநாதபுரம் மாவட்டம், ஆர்.எஸ்.மங்கலம் அருகே உப்பூரில், விநாயகர் கோவில் உள்ளது. இந்த கோயில் கருவறையில் உள்ள, விநாயகர் மீது, பகல் முழுவதும் சூரிய ஒளி படும் வகையில் கருவறை அமையப்பெற்றுள்ளதால், இந்த விநாயகர் வெயிலுகந்த விநாயகர் என அழைக்கப்படுகிறார். கோயிலில் சதுர்த்தி விழா ஆக. 22-ல் கொடியேற்றத்துடன் தொடங்கியது. பத்து நாட்கள் நடைபெறும் சதுர்த்தி விழாவில், தினமும் மாலையில் வெள்ளி மூசிகம், கேடகம், சிம்மம், மயில், யானை, ரிஷபம், காமதேனு உள்ளிட்ட வாகனங்களில் விநாயகர் வீதி ஊர்வலம் நடைபெற்றது. விழாவின் எட்டாம் நாளான இன்று மாலை 04.55 மணிக்கு விநாயகருக்கு சித்தி, புத்தி, ஆகிய இரு தேவியருடன் திருக்கல்யாணம் நடைபெற்றது. வட மாநிலங்களில் மட்டுமே, விநாயகருக்கு திருமணம் நடைபெறுவது வழக்கமாகும். இந்த நிலையில், தென் தமிழகத்தில் இரு தேவியருடன், இந்த விநாயகருக்கு திருக்கல்யாணம் நடைபெற்றதால், வெளி மாவட்டங்களில் இருந்து ஏராளமான பக்தர்கள் திருக்கல்யாணத்தில் கலந்து கொண்டனர். திருக்கல்யாணத்தை தொடர்ந்து நடைபெற்ற கொழுக்கட்டை மொய் விருந்தில், ஏராளமான பக்தர்கள் கலந்து கொண்டனர். பெண்களுக்கு மஞ்சள் கயிறு, குங்குமம் வழங்கப்பட்டன. தொடர்ந்து இரு தேவியருடன் குதிரை வாகனத்தில் திருமண கோலத்தில் விநாயகர் வீதி ஊர்வலம் நடைபெற்றது. விழாவின் தொடர்ச்சியாக இன்று மாலை தேரோட்டமும், நாளை சதுர்த்தி தீர்த்த வாரியும், நடைபெறுகிறது.