மயிலாடுதுறை : மயிலாடுதுறை ஐயாறப்பர் கோவிலில் திருவாசகம் முற்றோதலுக்கு சிப்பந்திகள்   தடை விதித்ததுடன் சிவனடியார்களை வெளியேற்றியதால் மோதல் ஏற்பட்டது.    

மயிலாடுதுறையில் திருவாவடுதுறை ஆதீனத்திற்கு சொந்தமான ஐயாரப்பர் கோவில் அமைந்துள்ளது. அனவிந்தை வழிபாடு செய்த  பழமை வாய்ந்த இந்த  கோவிலில், சிவனடியார்கள் சார்பில்  மாதந்தோறும் மகம் நட்சத்திரத்தில்   திருவாசகம் முற்றோதல் நடைபெற்று வந்தது. நேற்று 52 ஆவது மாதமாக  திருவாசகரன் முற்றோதல் நடைபெற்றது. மதியம் பூஜை முடிந்து கோயில் நடை சாத்தாமல் நிகழ்ச்சி மாலை 4மணி வரை நடைபெற்று வந்த நிலையில் மதியம் ஒரு மணிக்கு நடை சாத்துவதற்கு முன்பாக திருவாசகம் படிக்கும் நிகழ்ச்சியை  முடித்து  கொள்ளுமாறு கோயில் நிர்வாகத்தினர் தெரிவித்ததாக கூறப்படுகிறது. ஆனால் மதிய உச்சி கால பூஜை முடிந்த பிறகும் திருவாசகம் படிக்கும் நிகழ்ச்சி  நடைபெற்றது. அப்போது மயூரநாதர் கோவில் கண்காணிப்பாளர் கணேசன் தலைமையில் அங்கு வந்த திருவாவடு துறை ஆதீன மடத்தின் பணியாளர்கள்   திருவாசகம் முற்றோதல் நிகழ்ச்சியை மேற்கொண்ட பக்தர்களை கோயில் ஆகம விதிப்படி மதியம் ஒரு மணிக்கு நடை சாத்த வேண்டும் என்று கூறி வெளியேற்றினர்.   மேலும்  திருவாசகம் பாடி மாகேஸ்வர பூஜை எனப்படும் அடியார்கள் உணவு உண்ணும் நிகழ்ச்சியின்போது அனைவரும் வெளியேற்றப்பட்டனர். அப்போது   இருதரப்பினரிடையே மோதல் ஏற்பட்டது. சிறுவன் மற்றும் பெண் ஒருவரை கோயில் நிர்வாகத்தினர் தாக்கியதாகவும், கோயிலில் நடைபெற வேண்டிய நிகழ்ச்சிகளை நிர்வாகிகள் நடத்தாதது குறித்து கேள்வி எழுப்பியதால் சிவனடியார்களின் நிகழ்ச்சிக்கு கோயில் நிர்வாகித்தனர் தடை விதிப்பதாக  சிவனடியார்கள் கூட்டத்தினர் குற்றம் சாட்டியுள்ளனர்.  இச்சம்பவம் தொடர்பாக கோயில் நிர்வாகத்தின் அனுமதி பெறாமல் கோயில் நடை சாத்துவதற்கு இடையூறு அளித்து சிவனடியார்கள் கூட்டத்தினர் கோயில் ஊழியரை தாக்கியதாக மயிலாடுதுறை போலீஸ் ஸ்டேஷனில் கோவில் நிர்வாகத்தினர் புகார் அளித்துள்ளனர். இதுகுறித்து மயிலாடுதுறை போலீசார் விசாரணை நடத்தியபோது இருதரப்பினரும் பேசி சமரசம் செய்து கொண்டதாக போலீசார் தெரிவித்தனர். பக்தர்களை கோவில் நிர்வாகத்தினர் வெளியேற்றும் போது ஏற்பட்ட மோதல் காட்சிகள் சமூக வலைதளத்தில் வைரலாகியுள்ளது.