சென்னை; வடபழநி ஆண்டவர் கோவிலில், நவராத்திரி விழா நேற்று கோலாகலமாக துவங்கியது.சென்னை மாநகரில் பிரசித்தி பெற்ற தலங்களில் ஒன்றாக, வடபழநி ஆண்டவர் கோவில் விளங்குகிறது. கோவிலில் ஆண்டுதோறும் நவராத்திரி விழா விமரிசையாக கொண்டாடப்படுகிறது.இந்தாண்டிற்கான விழா, சக்தி கொலு எனும் பெயரில் நேற்று துவங்கியது. இதை, பிரபல கர்நாடக இசைப்பாடகி சுதா ரகுநாதன், கோவில் தக்கார் இல.ஆதிமூலம், சுதா ஆதிமூலம், கோவில் துணைக் கமிஷனர் முல்லை, கர்நாடக இசைக் கலைஞர் அருண் மற்றும் பக்தர்கள் அபர்ணா, அனுராதா ஆகியோர் குத்துவிளக்கேற்றி துவக்கி வைத்தனர். அக்., 4ம் தேதி வரை நடக்கிறது. இரவு 7:00 மணிக்கு அருணின் இசைக் கச்சேரி நடந்தது.நவராத்திரி விழாவில், காலை 11:00 மணி முதல் 11:30 மணி வரையிலும் மாலை 6:00 மணி முதல் 6:30 மணி வரையிலும் சிறப்பு பூஜை, தீபாராதனை நடத்தப்படுகிறது. தினமும் மாலை 4:00 மணி முதல் 5:00 மணி வரை, 108 நபர்கள் கொண்ட குழுவினரால் லலிதா சகஸ்ரநாம பாராயணம் நடத்தப்படுகிறது.மாலை 5:30 மணி முதல் மாலை 6:00 மணி வரை வேத பாராயணம், ஸ்ரீ ருத்ரம், சமஹம், ஸ்ரீ சுக்தம் நடக்கிறது. மாலை, 6:30 மணி முதல் 7:00 மணி வரை சிறப்பு குழுவினரின் கொலு பாட்டு நடக்கிறது. இரவு 7:00 மணிக்கு இசைக் கச்சேரி, நாமசங்கீர்த்தனம், சொற்பொழிவு நடக்கிறது.

ஏகதின லட்சார்ச்சனை: நவராத்திரி சிறப்பு நிகழ்வாக, மீனாட்சி அம்மனுக்கு அக்., 2ம் தேதி, காலை 7:30 மணி முதல் மதியம் 12:30 மணி வரையிலும், மாலை 4:30 மணி முதல் இரவு 8:30 மணி வரையிலும் ஏகதின லட்சார்ச்சனை நடக்க உள்ளன.