மானாமதுரை : சிவகங்கை மாவட்டம் மானாமதுரை அருகே மாங்குடி கிராமத்தில் முற்கால பாண்டியர் காலத்தைச் சேர்ந்த பிரகஸ்பதி மகனான கசன் சிற்பம் வரலாற்று ஆய்வாளர்களால் கண்டுபிடிக்கப்பட்டுள்ளது.

மாங்குடி கிராமத்தைச் சேர்ந்த பூஜாரி சிங்கராஜா கொடுத்த தகவலின்படி பாண்டியநாடு பண்பாட்டு மையத்தை சேர்ந்த மீனாட்சி சுந்தரம், தாமரைக்கண்ணன் கள ஆய்வு மேற்கொண்டபோது அங்கு ஒரு கசன் சிற்பம் கண்டுபிடிக்கப்பட்டது. இது குறித்து அவர்கள் கூறியதாவது, இந்த கசன் என்பவர் மகாபாரதம், மச்ச புராணம், அக்னி புராணங்களின்படி தேவர்களின் குருவான பிரகஸ்பதியின் மகன் ஆவார், அசுரர்களின் குருவான சுக்ராச்சாரியாரிடம் இருந்து இறந்தவர்களை உயிர்ப்பிக்கும் சஞ்சீவினி மந்திரத்தை கற்றுக் கொண்டு வருவதற்காக பிரகஸ்பதியால் அனுப்பப்பட்டவரே இந்த கசன் ஆவார். இந்த அபூர்வமான சிற்பமானது தற்போது சிவகங்கை மாவட்டம் மானாமதுரை அருகே மாங்குடி கிராமத்தில் கிடைத்திருப்பது வியப்பாக உள்ளது.

இந்த சிற்பம் 3அடி உயரத்தில் தலையின்றி காணப்படுகிறது ஒன்றரை அடி அகலம் கொண்ட பட்டையான கல்லில் புடைப்புச் சிற்பமாக செதுக்கப்பட்டுள்ளது. மார்பில் முத்து மாலையை அணிந்தவாறு தனது இடது தோளிலிருந்து மார்பு வழியாக தனது வலது இடுப்பு வரை ஒரு பட்டையான முப்புரி நூல் செதுக்கப்பட்டுள்ளது. கரங்களில் வலது கரத்தில் தாமரை மலரையும்,இடது கரத்தை தொடைமீது வைத்து நின்ற கோலத்தில் சிற்பம் செதுக்கப்பட்டுள்ளது. சேதமடைந்த தலை பாகங்களும்,ஒரு ஐந்து தலை நாகர் சிற்பமும் சிதைந்த நிலையில் அருகில் இருப்பதைப் பார்க்கும்போது இங்கு முற்கால பாண்டியர் காலத்தைச் சேர்ந்த கோயில் இருந்திருக்க வேண்டும் என்றும் இந்த சிற்பம் ஆயிரம் ஆண்டுகளுக்கு முற்பட்டதாக இருக்கலாம் என்று திருவண்ணாமலையைச் சேர்ந்த வரலாற்று ஆய்வாளர் ராஜா மற்றும் அருப்புக்கோட்டையை சேர்ந்த ஸ்ரீதர் கூறுகின்றனர். இது போன்ற அபூர்வமான கலைநயமிக்க முற்கால பாண்டியர் காலத்தைச்சேர்ந்த சிற்பங்கள் தொடர்ந்து சிவகங்கை மாவட்டம் மானாமதுரை மற்றும் சுற்றுவட்டார பகுதிகளில் கிடைத்து வருவது குறிப்பிடத்தக்கதாகும், ஆகவே தொல்லியல் துறையினர் இப்பகுதியில் ஆய்வு நடத்த வேண்டும் என்றனர்.