பழநி: பழநி, கந்தசஷ்டி விழாவில் நாளை சூரசம்ஹார திருவிழா மலைக்கோயில் கிரி வீதியில் நடைபெற உள்ளது. பழநிகோயிலில் காப்பு கட்டுதலுடன் கந்த சஷ்டி திருவிழா அக்.25., துவங்கியது. கந்த சஷ்டி திருவிழாவில் நாளை அக்.,30.,ல் மலைக்கோயிலில் அதிகாலை 4:00 மணிக்கு விஸ்வரூப தரிசனம் நடைபெறும்.

வின்ச், ரோப்கார் சேவை நிறுத்தம்: மலைக்கோயில் சென்று வர பயன்படும் வின்ச், ரோப்கார் சேவைகள் காலை 10:00 மணி முதல் இயங்காது. மலைக்கோயிலில் அனைத்து கட்டண சீட்டுகளும் காலை 11:00 மணிக்கு நிறுத்தப்படும். பக்தர்கள் 11:30 வரை பக்தர்கள் படிப்பாதையில் அனுமதிக்கப்படுவர். மதியம் 1:30 மணிக்கு சாயரட்சை பூஜை நடைபெறும். அதன்பின் மலைக்கொழுந்து அம்மனிடம் வேல் வாங்குதல் நடைபெற்று, கோயில் நடை அடைக்கப்படும்.

கிரிவீதியில் சூரசம்ஹாரம்: பெரியநாயகி அம்மன் கோயிலில் இருந்து வள்ளி, தேவசேனா சமேத முத்துக்குமார சுவாமி, மயில்வாகனத்தில் அடிவாரம், திருக்கல்யாண மண்டபத்தில் எழுந்தருள்வார். மலைக்கோயில் இருந்து இறங்கிய சின்னகுமாரசுவாமி மாலை 6:00 மணிக்கு மேல், வடக்கு கிரி வீதியில் தாரகாசுரன், கிழக்கு கிரிவிதியில் பானு கோபன், தெற்கு தெரு வீதியில் சிங்கமுகாசூரன், மேற்கு கிரிவீதியில் சூர பத்மன் என நான்கு சூரசம்ஹாரம் நடைபெறும். அதன் பின் ஆரியர் மண்டபத்தில் வெற்றி விழா நடைபெறும். இரவு 9:00 மணிக்கு மேல் சம்ரோட்சன பூஜைக்கு பின் அர்த்தஜாம பூஜை நடைபெறும்.

திருக்கல்யாணம்: அக்.,31.அன்று காலை 9.30 மணிக்கு மேல் மலைக்கோயிலில் வள்ளி, தேவசேனா சமேத சண்முகருக்கும் மாலை 7:00 மணிக்கு மேல் பெரிய நாயகி அம்மன் கோவிலில் வள்ளி, தேவசேனா சமேத முத்துக்குமார சுவாமிக்கும் திருக்கல்யாணம் நடைபெறும். நிகழ்ச்சி ஏற்பாடுகள் இணை கமிஷனர் நடராஜன் தலைமையில் நடைபெறும்.