திருக்கோவிலூர், வீரட்டானேஸ்வரர் கோவில் வளாகத்தில் மெய்ப்பொருள் நாயனாரின் 19 வது குருபூஜை விழாவில் சிவனடியார்கள் கலந்து கொண்டு இட்டலிங்க ஆத்ம லிங்க மூர்த்திகளுக்கு அபிஷேக ஆராதனை செய்தனர்.

நாயன்மார்கள் 63 வரில், விபூதியையும், சிவனடியாரையுமே சிவனாக கண்டு போற்றியவர் மெய்ப்பொருள் நாயனார். திருநீற்று செல்வர் என போற்றப்பட்ட இவர் திருக்கோவிலூரை தலைமையிடமாக கொண்டு ஆட்சி செய்தார். வீரட்டானேஸ்வரர் கோவில் வளாகத்தில் இவருக்கு சித்தி வளாகம் அமைந்துள்ளது. திருக்கோவிலூர் மெய்ப்பொருள் நாயனார் சித்தி வளாக வழிபாட்டு மன்றத்தின் சார்பில், 19 வது குருபூஜை விழா நேற்று நடந்தது. காலை 8:00 மணிக்கு மெய்ப்பொருள் நாயனார் சித்தி வளாகத்தில் அமைந்துள்ள மூலவர் திருமேனிக்கு அபிஷேகம், அலங்காரம், தீபாராதனை நடந்தது. 9.00 மணிக்கு செத்தவரை தர்ம பரிபாலன டிரஸ்ட் சுவாமிகள் சிவஜோதி மோன சித்தர் இடப்பக் கொடியை ஏற்றிவைத்தார். திருவண்ணாமலை ஜீவா அம்மாள், புதுவை தணிகாசலம், எலந்தம்பட்டு அருணாச்சலம் ஐயா, விருத்தாசலம் 63 திருப்பணி மன்ற நிர்வாகி சங்கர், விழுப்புரம் சங்கர் ஜி முன்னிலை வகித்தனர். அம்பாள் சன்னதியில் நூற்றுக்கும் மேற்பட்ட சிவனடியார்கள் இட்டலிங்க ஆத்ம லிங்க மூர்த்திகளுக்கு அபிஷேக ஆராதனை, மலர் வழிபாடு, ஒலி வழிபாடுகளை செய்தனர். மாலை 3:00 மணிக்கு சிவனடியார்கள் திருமுறைப் பாடல், பரனூர் அம்பலவாணன், வேட்டவலம் விஸ்வநாதன், திருக்கோவிலூர் கண்ணன் மெய்ப்பொருள் நாயனார் குறித்து சொற்பொழிவு நிகழ்த்தினர். மாலை 6:00 மணிக்கு ஜீவ சீனிவாசனின் இசை சொற்பொழிவு நடந்தது‌. மெய்ப்பொருள் நாயனார் சித்தி வளாக வழிபாட்டு மன்ற செயல் தலைவர் ராமமூர்த்தி நன்றி கூறினார்.