திருக்கோவிலூர்: திருப்பாலப்பந்தல் சிவன் கோவிலில் ஒதுக்கி வைக்கப்பட்டு இருக்கும் சிலைகள் 13ம் நூற்றாண்டை சேர்ந்த மன்னர் சிலைகள் எனத் தெரியவந்துள்ளது.

திருக்கோவிலூர் அடுத்த திருப்பாலப்பந்தல் கிராமத்தில் பழமையான திருநாகீஸ்வரர் கோவில் உள்ளது. இக்கோவிலை விழுப்புரத்தைச் சேர்ந்த வரலாற்று ஆய்வாளர் செங்குட்டுவன் ஆய்வு செய்து கூறியதாவது: திருநாகீஸ்வரர் கோவிலும்,அதன் சுற்றுப்பகுதியிலும் சோழர்காலம் முதல் விஜயநகர காலம் வரையிலான 42 கல்வெட்டுகள் இடம் பெற்றுள்ளன. இவை மத்திய அரசின் தொல்லியல் துறையின் ஆய்வு அறிக்கையில் பதிப்பித்து வெளியிடப்பட்டுள்ளது. பல்வேறு மன்னர்கள் காலங்களில் திருநாகேஸ்வரர் கோவிலுக்கு செய்யப்பட்ட திருப்பணிகளை இக்க கல்வெட்டுகள் தெரிவிக்கின்றன. இதில் குறிப்பிடத் தகுந்தவர்கள் சூரியதேவன், எதிரிகள் நாயகன், சோழகங்க தேவன் எனும் பெயர்களால் அழைக்கப்படும் சூரியன் நீரேற்ற பெருமாள். எலவனசூர்கோட்டையைத் தலைநகரமாக கொண்டு ஆட்சி செய்தவர் கிளியூர் மலையமான் வழித் தோன்றல். மற்றொருவர் பொன்பரப்பினான் ராசராச தேவனான மகதேசன். சேலம் மாவட்டம் ஆறகளூரைத் தலைநகரமாக கொண்டு ஆட்சி நடத்தியவர். இவரது தாயார் புண்ணியவாட்டியின் சொந்த ஊர் திருப்பாலப்பந்தல் என்பது குறிப்பிடத்தக்கது. கோவிலை ஆய்வு செய்தபோது, பலகை கல்லில் வடிக்கப்பட்ட சிற்பம் ஒன்றும், தனிக்கல்லில் வடிக்கப்பட்ட சிற்பம் ஒன்றும் இருப்பது கண்டறியப்பட்டது. கைகளைக் கூட்டி வணங்கிய நிலையில் நின்று இருக்கும் இந்த சிற்பங்கள் சூரியன் நீரேற்ற பெருமாள், மகதேசன் ஆகியோருக்கு உரியதாகும். கடந்த சில ஆண்டுகளுக்கு முன்பு மண்ணில் புதையுண்டு மீட்கப்பட்ட இந்த சிற்பங்கள் இதுவரை அடையாளம் காணப்படாமல் இருந்தன. தற்போது அடையாளம் காணப்பட்டுள்ளன. இவற்றை உரிய முறையில் பாதுகாக்க வேண்டும் இவ்வாறு செங்குட்டுவன் தெரிவித்துள்ளார்.