பழநி : திண்டுக்கல் மாவட்டம் பழநி மலை முருகன் கோயில் கும்பாபிஷேகம் ஜன.,27 ல் நடக்க உள்ளதை முன்னிட்டு நேற்று வேள்விச்சாலை பூஜைகள் துவங்கின.

பழநி கோயில் படிப்பாதை கோயில்களுக்கு ஜன.26 மூலவருக்கு ஜன.27ல் கும்பாபிஷேகம் நடக்கிறது. இதை முன்னிட்டு நேற்று (ஜன.,23) காலை 6:00 மணிக்கு சூரிய ஒளியிலிருந்து நெருப்பு எடுக்கப்பட்டு பிரகாரம் வழியாக வேள்வி சாலைக்கு கொண்டு செல்லப்பட்டது. காலை 9:00 மணிக்கு மலைக்கோயில் படிப்பாதை, உபகோயில் சன்னதிகளுக்கு அஷ்டபந்தன மருந்து சாத்தல் நடந்தது. உணவுத்துறை அமைச்சர் சக்கரபாணி, பழநி எம்.எல்.ஏ., செந்தில்குமார், அறங்காவலர் குழு தலைவர் சந்திரமோகன், கோயில் இணை ஆணையர் நடராஜன் கலந்து கொண்டனர்.

மாலை 6:30 மணிக்கு கருவறை நிறைகுடங்கள் அலங்கரித்தல், ஆனந்த விநாயகர், கைலாசநாதர், மலைக் கொழுந்தம்மன், மலைக்கொழுந்தீஸ்வரர், வள்ளி, தெய்வானை, சண்முகர், சின்ன குமாரர், தண்டாயுதபாணி சுவாமி சன்னதி, தங்க விமானம், ராஜகோபுரம், சண்டிகேஸ்வரர் கோயிலின் குடங்களை அலங்கரித்து கருவறை அருள் சக்தி குடங்களில் எழுந்தருள, கருவறையிலிருந்து வேள்விச்சாலைக்கு குடங்கள் எழுந்தருள செய்தல் நடந்தது. பின் முதல் கால வேள்வி துவங்கியது. ஜன., 27வரை மூலவர் சன்னதியில் பக்தர்கள் தரிசனம் செய்ய அனுமதி இல்லை. வேள்விச் சாலையில் அருட்சக்தியை தரிசிக்கலாம். இன்று காலை 8:30 மணிக்கு இரண்டாம் கால பூஜை வேள்விச்சாலையில் நடக்கும். இதனுடன் கந்தபுராணம், திருப்புகழ், கந்தர் அலங்காரம், திருமுறை முற்றோதல், காலை 11:45 மணிக்கு நிறைவேள்வி நடக்கிறது. முதல் கால யாக வேள்வி துவங்கிய நிலையில் நேற்றிரவு பழநியில் சாரல் மழை பெய்தது.