திருப்புவனம்: திருப்புவனம் புஷ்பவனேஷ்வரர் - சவுந்தரநாயகி அம்மன் கோயில் பங்குனி திருவிழாவை முன்னிட்டு நடந்த திருக்கல்யாண உற்சவத்தில் ஏராளமான பெண்கள் பங்கேற்றனர். காசியை விட அதிகம் புண்ணியம் தரும் ஸ்தலமான புஷ்பவனேஷ்வரர் ஆலயத்தில் பங்குனி திருவிழா கடந்த ஞாயிறு அன்று கொடியேற்றத்துடன் தொடங்கியது. தினசரி அம்மனும் சுவாமியும் காலை, இரவு என இருவேளையும் வீதியுலா வந்து பக்தர்களுக்கு காட்சியளித்தனர். நேற்று 8ம் நாளான திருக்கல்யாண உற்சவத்தை முன்னிட்டு அலங்கரிக்கப்பட்ட திருக்கல்யாண மண்டபத்தில் அம்மனும், சுவாமியும் எழுந்தருளினர். பட்டு வேஷ்டி, பட்டு சேலை அணிவிக்கப்பட்டது. முற்பகல் 11.30 மணிக்கு அம்மன் சார்பாக சிவராஜ் பட்டரும், சுவாமி சார்பாக அசோக் பட்டரும் மாலை மாற்றி கொண்டனர். பின் திருக்கல்யாண உற்சவம் பக்தர்களின் கரகோஷத்திற்கு இடையே வெகு சிறப்பாக நடந்தது. விழாவில் மாவட்ட ஆட்சியர் மதுசூதன்ரெட்டி குடும்பத்துடன் கலந்து கொண்டார். திருக்கல்யாண உற்சவத்தை முன்னிட்டு திருமணமான பெண்கள் திருமாங்கல்ய கயிறு மாற்றி கொண்டனர். பக்தர்களுக்கு பிரசாதம் வழங்கப்பட்டது. திருக்கல்யாண உற்சவம் நடந்த பின் மணமக்கள் பட்டர்கள் இருவரும் திருக்குடை ஏந்தி வீதியுலா வந்தனர். பெண்கள் ஆரத்தி எடுத்தனர். அன்னதானம் நடைபெற்றது. திருக்கல்யாண உற்சவம் ஞாயிற்று கிழமை என்பதால் நேற்று ஆயிரத்திற்கும் மேற்பட்ட பெண்கள் பங்கேற்றனர். கூட்ட நெரிசலை பயன்படுத்தி செல்வராணி என்பவரின் நான்கு பவுன் தாலி செயின் உட்பட மொத்தம் ஐந்து பெண்களிடம் இருந்து 15 பவுன் தங்க நகைகள் திருடு போயின. நகைகயை பறிகொடுத்த பெண்கள் போலீசாரிடம் அழுது புலம்பினர்.