சிவகாசி: சிவகாசி அருகே திருத்தங்கல் நின்ற நாரயண பெருமாள் கோயில் அருகே மேல மாட வீதியில் முற்கால பாண்டியர் காலத்து நடுகல் சிற்பம் , வட்டெழுத்து கல்வெட்டை மாநகராட்சி அதிகாரிகள் கண்டுபிடித்தனர்.

திருத்தங்கல் நின்ற நாராயண பெருமாள் கோயில் மேல மாட வீதியில் பாறையில் வெட்டப்பட்ட புடைப்பு சிற்பத்துடன் கூடிய முற்கால பாண்டியர் காலத்து நடுகல் சிற்பம் மற்றும் தலைகீழாக உள்ள வட்டெழுத்து கல்வெட்டு ஆகியவை 1922 ல் தொல்லியல் துறையால் ஆவணப்படுத்தப்பட்டது. மீண்டும் 2005 ல் தொல்லியல் துறையால் பதிவு செய்துள்ளது. ஆனால் தற்போது சிற்பம் மண்ணில் புதைந்து மறைந்த நிலையில் உள்ளதாக திருத்தங்கலை சேர்ந்த தொல்லியல் ஆய்வாளர் பாலசந்திரன் கலெக்டர் ஜெயசீலனுக்கு தகவல் அளித்தார். இதையடுத்து கலெக்டர் சிற்பம் உள்ள இடத்தை கண்டறிய மாநகராட்சி கமிஷனர் சங்கரனுக்கு உத்தரவிட்டார். தொடர்ந்து கமிஷனர், மாநகராட்சி அலுவலர்களுடன் நேரடியாக சென்று மேல மாட வீதி பகுதியில் நடுகல் சிற்பம் உள்ள இடத்தை தேடினர். பெருமாள் கோயில் மண்டம் அருகே மண்ணில் புதைந்து இருந்த நடுகல் சிற்பம், வட்டெழுத்து கல்வெட்டு ஆகியவற்றை கண்டறிந்து மீட்டனர். அந்த கல்வெட்டில் போரில் வீரமரணம் அடைந்த வீரருக்கு ரத்தக்காணியாக நிலம் வழங்கிய தகவல் இடம் பெற்றுள்ளது. தொடர்ந்து அப்பகுதியில் தோண்டும் பணி நடந்து வருகிறது. சுகாதார ஆய்வாளர் பாண்டியராஜன், தாசில்தார் லோகநாதன், வி.ஏ.ஓ பாண்டி மாநகராட்சி சுகாதார பணியாளர்கள் கண்டெடுப்பு பணியில் ஈடுபட்டனர்.