சோழவந்தான்: சோழவந்தான் அருகே குருவித்துறை சித்திர ரத வல்லப பெருமாள் கோயிலில் உள்ள சேதமடைந்த உற்சவ சிலைகளை அறநிலையத் துறை அதிகாரிகள் முன்னிலையில் செப்பனிடும் பணி நடந்தது.

இக்கோயிலில் கடந்த 2018ல் கும்பாபிஷேகம் நடந்த முடிந்தது. அடுத்த மாதமே இங்குள்ள உற்சவர்களான சித்திர ரத வல்லப பெருமாள், பஞ்சமூர்த்தி பெருமாள் ஆகிய 2 பஞ்சலோக சிலைகளையும் திருடு போனது. இதையடுத்து அச்சிலைகள் இரண்டும் கையில் இருந்த கதை பகுதியை அறுத்தெடுத்த நிலையில் போலீசார் கண்டெடுத்தனர். சேதமான சிலைகள் இரண்டையும் வைத்தே குருவித்துறை கிராம மக்கள் விழா கொண்டாடி வந்தனர். இந்நிலையில் சிலைகள் திருடு போனதால் வைகுண்ட ஏகாதசி திருவிழா 5 ஆண்டுகளாக தடைபட்டு இருந்தது. தற்போது விழா கமிட்டி மூலம் நீதிமன்றத்தில் சிலையை சரிசெய்து கிராம மக்களின் வழிபாட்டிற்கு உத்தரவிட வேண்டும் என வழக்கு தொடுத்தனர். நீதிமன்றம் பொதுமக்கள், அறநிலையத்துறை உயர் அதிகாரிகள் முன்னிலையில் சிலையை சரிசெய்து ஆகம விதிப்படி பூஜைகள் செய்து கிராம மக்கள் வழிபாடு செய்து விழா கொண்டாட உத்தரவிட்டது. இதையடுத்து இன்று அறநிலையத்துறை துணை ஆணையர் சுவாமிநாதன், மண்டல ஸ்தபதி ஜெயராம், எழுத்தர் ராஜேஷ் கண்ணா, சரக ஆய்வர் ஜெயலெட்சுமி, ஆலய அர்ச்சகர்கள் முன்னிலையில் சிலையின் சேதமான பகுதியை மாமல்லபுரம் பெருமாள் ஸ்தபதி ஆர்ட்ஸ் (பி) லிமி., சார்பில் செப்பனிடும் பணிகள் நடந்தது.

ஆலய அர்ச்சகர்கள் கூறுகையில், " இச்சிலையின் சேதமான பகுதிகளை செப்பனிடும் பணிகள் முடிவடைந்த பிறகு ஆகம விதிப்படி திருமஞ்சனம், கும்பாபிஷேகம் செய்து, சிலைகளை பிரதிஷ்டை செய்யப்படும். பிறகு இந்தாண்டின் இறுதியில் வரும் வைகுண்ட ஏகாதசி தினத்தில் உற்சவர் சிலையை கிராம வழிபாட்டிற்கு சென்று திருவிழா நடைபெறும் என்றனர்.