டேராடூன்: உத்தரகண்ட் மாநிலத்தின் ருத்ரபிரயாக் மாவட்டத்தில் பிரபல கேதார்நாத் புனித தலம் அமைந்துள்ளது. இந்த சிவன் கோவிலுக்கு புனித யாத்திரை துவங்கி நடைபெற்று வந்த நிலையில், கோயிலில் மூலவர் மீது ஒரு பெண் ரூபாய் நோட்டுகளை தூவுவது போன்ற வீடியோ வைரலாகி வருகிறது. இதுகுறித்து நடவடிக்கை எடுக்குமாறு கோயில் நிர்வாகம் சார்பில் போலீஸில் புகார் செய்யப்பட்டுள்ளது.

உத்தராகண்ட் மாநிலம், கேதார்நாத்தில் புகழ்பெற்ற கேதார்நாத் சிவன் கோயில் உள்ளது. இக்கோயில் ஏப்ரல் முதல் 6 மாதங்களுக்கு மட்டுமே திறந்திருக்கும். அந்த வகையில் இப்போது கோயில் திறந்திருப்பதால் பக்தர்கள் புனித யாத்திரை சென்று தரிசனம் செய்து வருகின்றனர். இந்நிலையில், கேதார்நாத் கோவில் கருவறையில் உள்ள மூலவர் சிவலிங்கம் மீது ஒரு பெண் ரூபாய் நோட்டுகளை தூவுவது போன்ற வீடியோ சமூக வலைதளங்களில் வைரலாகி வருகிறது. இக் கோயிலில் புகைப்படம், வீடியோ எடுக்க தடை விதிக்கப்பட்டுள்ள நிலையில் அந்தப் பெண் யார்? எப்படி  வீடியோ எடுத்தார் என தெரியவில்லை.

இதுகுறித்து கோயில் குழு வெளியிட்டுள்ள அறிக்கையில்.. சிவலிங்கத்தின் மீது ரூபாய் நோட்டுகள் தூவுவது போன்ற வீடியோ வெளியாகி உள்ளது. இது கண்டிக்கத்தக்கது. இது தொடர்பாக கோயில் தலைவர் அஜேந்திர அஜய் காவல் துறையில் புகார் செய்துள்ளார். மாவட்ட ஆட்சியர் மற்றும் காவல் துறை கண்காணிப்பாளருடன் தொடர்பு கொண்டு இதுபற்றி கூறி உள்ளார். அந்த பெண் மீது கடும் நடவடிக்கை எடுக்குமாறு கேட்டுக் கொண்டுள்ளார். என தெரிவித்துள்ளனர்.