தஞ்சாவூர், தஞ்சாவூர் மாவட்டம் கும்பகோணம் அருகே ஒப்பிலியப்பன் கோவில் வேங்கடாசலபதி சுவாமி கோவிலில் மகா கும்பாபிஷேகம் இன்று (29ம் தேதி) வெகு விமர்சையாக நடந்தது.

தமிழக திருப்பதி என அழைக்கப்படும் இக்கோவில் 108 திவ்ய தேசங்களில் ஒன்று. நம்மாழ்வார், திருமங்கையாழ்வார், பொய்கையாழ்வார், பேயாழ்வார் ஆகியோரால் மங்களாசாசனம் செய்யப்பட்ட இக்கோவில் பூலோக வைகுந்தம், திருவிண்ணகர் என போற்றப்படுகிறது. இத்தலம் திருவேங்கடம் என்றும், திருப்பதியைப் போலவே பல்வேறு வகைகளில் பெரியதொரு பிரார்த்தனை தலமாகவும் விளங்கி வருகிறது. 14 ஆண்டுகளுக்கு பிறகு கோவிலில் விமானங்கள், கோபுரங்கள், பிரகாரங்கள், சிறு சன்னதிகள் ஆகியவற்றில் திருப்பணிகள் நடைபெற்று வந்தன. இத்திருப்பணிகள் நிறைவடைந்ததைத் தொடர்ந்து, கும்பாபிஷேகம் விழா ஜூன் 25ம் தேதி தொடங்கியது. இதில், காலையில் புண்யாஹவாசனம், ஸ்ரீசுதர்சன ஹோமம், வேத, திவ்யப்பிரபந்த, ஸ்ரீபாஷ்யாதிக்ரந்த பாராயணம் ஆகியவை நடைபெற்றன. மாலையில் முதல் கால யாக பூஜைகள் தொடங்கி, பூர்ணாஹூதியுடன் நிறைவடைந்தது. தொடர்ந்து, ஜூன் 26 ம் தேதி காலை இரண்டாம் கால யாக பூஜைகள், மாலை மூன்றாம் கால யாக பூஜைகள், 27ம் தேதி நான்காம் கால யாக பூஜைகள், மாலை ஐந்தாம் கால யாக பூஜைகள், நேற்று  காலை ஆறாம் கால யாக பூஜைகள், மாலை ஏழாம் கால யாக பூஜைகள் ஆகியவை நடைபெற்றன. இதைத்தொடர்ந்து, இன்று (29ம் தேதி) காலை புண்யாஹவாசனம், திருவாராதனம், ஹோமங்கள், யாத்ராதானம், பஞ்ச, தச தானங்கள், கடம் புறப்பாடு உள்ளிட்டவை நடைபெற்றன. தொடர்ந்து, காலை 9 மணி முதல் 10 மணிக்குள் விமான மற்றும் மூலவர் கும்பாபிஷேகம் விழா நடைபெற்றது. இதில், ஏராளமான பக்தர்கள் கலந்து கொண்டு வழிபட்டனர். பின்னர், ஆராதனம், சாற்றுமுறை, ப்ரஹ்மகோஷம், ஆசீர்வாதம், யஜமான ஆச்சார்ய மரியாதை, பொது ஜன சேவை, இரவு 7 மணிக்கு பெருமாள் தாயார் தங்க கருட சேவை, திருவீதி புறப்பாடு ஆகியவை நடைபெறவுள்ளன.