காங்கேயம்; சிவன்மலை ஆண்டவன் உத்தரவு பெட்டியில், நான்கு அஸ்திரங்கள், 101 ரூபாய், ஆறு எலுமிச்சம் பழம் வைத்து நேற்று முதல் பூஜிக்கப்படுகிறது.

திருப்பூர் மாவட்டம் காங்கேயத்தை அடுத்த சிவன்மலை சுப்ரமணியசுவாமி கோவிலில், ஆண்டவன் உத்தரவு பெட்டி உள்ளது. பக்தர்களின் கனவில் சிவன்மலை ஆண்டவர் குறிப்பால் உணர்த்தப்படும் பொருள், பெட்டியில் வைத்து பூஜை செய்வது, நுாற்றாண்டு வழக்கமாக உள்ளது. அடுத்த பொருள் வரும் வரை, முந்தைய பொருள் இருக்கும். அதேசமயம் பெட்டியில் வைக்கப்படும் பொருள், சமுதாயத்தில் ஏதாவது தாக்கத்தை ஏற்படுத்தும். அல்லது நடப்பதை முன்கூட்டி கணிப்பதாக இருக்கும் என்பது, பக்தர்களின் நம்பிக்கையாக உள்ளது. கடந்த ஜூலை, 17ம் தேதி முதல், தீர்த்தக் கலசம் வைத்து பூஜிக்கப்பட்டது. இந்நிலையில் திருப்பூர் மாவட்டம் முத்துாரை சேர்ந்த கோகுல்ராஜா, 40, கனவில் விருஷ்ப அஸ்திரம், தனுார்பாண அஸ்திரம், வருண அஸ்திரம், பாசுபத அஸ்திரம், ஆறு எலுமிச்சம் பழம், 101 ரூபாய் வைக்க உத்தரவானது. இதையடுத்து இந்தப் பொருட்கள், இன்று முதல் பெட்டியில் இடம் பெற்றுள்ளது. முக்கிய அஸ்திரங்கள் இடம் பெற்றுள்ளதால் தீமைகள் அழியும், வருண அஸ்திரத்தால் நல்ல மழை கிடைக்கும் என பக்தர்கள் தெரிவித்தனர்.