உளுந்தூர்பேட்டை: பாதூர் ஸ்ரீ பிரசன்னா வெங்கடேச பெருமாள் கோவில் ரதாரோஹணம் ரதோற்சவத்தில் ஏராளமான பக்தர்கள் கலந்து கொண்டு வடம் பிடித்து இழுத்தனர்.

உளுந்தூர்பேட்டை தாலுகா பாதூர் ஸ்ரீ பிரசன்னா வெங்கடேச பெருமாள் கோவிலில் பிரம்மோற்சவ விழா நடந்து வருகிறது. கடந்த 15ம் தேதி ஸ்ரீசெல்வர் மேனாவில் புறப்பாடும், அங்குரார்ப்பணம் நிகழ்ச்சியுடன் துவங்கியது. 16ம் தேதி திருப்பல்லக்கும், ததியாராதனம், ஹம்ஸ வாகனத்தில் சுவாமி வீதியுலா நடந்தது. 17ம் தேதி சந்திர பிரபையும், 18ம் தேதி அனுமந்த் வாகனத்திலும், 19ம் தேதி சேஷ வாகனத்திலும் சுவாமி வீதியுலா நடந்தது. 20ம் தேதி காலை 11 மணியளவில் திருப்பல்லக்கில் பெருமாள் நாச்சியார் திருக்கோல சேவை விசேஷ திருமஞ்சனமும், ததியாராதனமும் நடந்தது. அதனைத் தொடர்ந்து இரவு 10 மணியளவில் தங்கக் கருட வாகனத்தில் சுவாமி சிறப்பு அலங்காரம் செய்யப்பட்டு தீபாராதனை வழிபாடு வீதியுலா நடந்தது. 21ம் தேதி காலை 8 மணியளவில் திருப்பல்லக்கும், விசேஷத் திருமஞ்சனமும், விசேஷ சாற்று முறையும் நடந்தது. 22ம் தேதி காலை 10 மணியளவில் ஸ்ரீமத் ஆதிவண் சடகோப யதிந்திர மகா தேசிகன் திருவீதி புறப்பாடும், இரவு 10 மணியளவில் திருக்கல்யாணம், புஷ்ப பல்லாக்கில் சுவாமி வீதியுலா நடந்தது. இன்று காலை காலை 7 மணியளவில் சுவாமி சிறப்பு அலங்காரம் செய்யப்பட்டு ரதாரோஹணம் ரதோற்சவம் நடந்தது. தீபாராதனை வழிபாடுகளுடன் தூங்கிறது ஏராளமான பக்தர்கள் கலந்து கொண்டு வடம்பிடித்து இழுத்து வழிபட்டனர். ரதோற்சவத்தையொட்டி திருநாவலூர் போலீசார் பாதுகாப்பு பணியில் ஈடுபட்டனர். 27ம் தேதி ஸ்ரீநிகமாந்த மகாதேசிகன் திருவீதியுலாவுடன் விழா நிறைவு பெறுகிறது.