கிருஷ்ணகிரி: அத்திமுகம் கிராமத்தில் கண்டெடுக்கப்பட்ட, 13ம் நுாற்றாண்டை சேர்ந்த, 3 கற்சிலைகள், கிருஷ்ணகிரி அரசு அருங்காட்சியகத்தில் ஒப்படைக்கப்பட்டன. கிருஷ்ணகிரி மாவட்டம், பேரிகை அருகே உள்ள அத்திமுகம் கிராமத்தில், கிருஷ்ணன் என்பவர் வீடு கட்ட பள்ளம் தோண்டினார். அப்போது, 2.7 அடி உயர பைரவர் சிலை, 2.4 அடி உயர சண்டிகேஸ்வரர் சிலை மற்றும் 3 அடி உயர துர்கை சிலை கண்டெடுக்கப்பட்டன. இதை மீட்ட சூளகிரி தாசில்தார் சக்திவேல், மாவட்ட கலெக்டர் சரயுவின் ஒப்புதலோடு, கிருஷ்ணகிரி மாவட்ட அரசு அருங்காட்சியகத்தில் ஒப்படைத்தார். இது குறித்து, அருங்காட்சியக காப்பாட்சியர் கோவிந்தராஜ் கூறியதாவது: இம்மூன்று கற்சிற்பங்களும், 13ம் நுாற்றாண்டை சேர்ந்தவை. ஆங்காங்கே லேசாக சேதமடைந்து இருந்தாலும், மிகுந்த கலை அழகுடன் உள்ளன. பைரவர் பின்னால் நாயும், பின் கைகளில் உடுக்கை, பாசக்கயிறு உள்ளன. முன் கைகளில் சூலம், பிச்சைப்பாத்திரம் உள்ளன. சண்டிகேஸ்வரர் சிற்பம், சுகாசன அமர்வில், வலது கையில் கோடாரி, இடது கையை கடக முத்திரையாக வைத்துள்ளார். துர்க்கை அம்மன் சிற்பம் எருமை தலைமீது நேராய் நின்றவாறு, பின் கைகளில் சங்கும், சக்கரம், முன் கைகளில் வலது கை அபய முத்திரை, இடது கையை தொடை மீது வைத்துள்ளார். இம்மாவட்டத்தின் பிற்கால சோழர்களின் கலைக்கு, இச்சிற்பங்கள் சிறந்த எடுத்துக்காட்டு. இவ்வாறு, அவர் கூறினார். வரலாற்று ஆய்வு மற்றும் ஆவணப்படுத்தும் குழு ஒருங்கிணைப்பாளர் தமிழ்ச்செல்வன் உடனிருந்தார்.