மேட்டுப்பாளையம்: காரமடை அரங்கநாதர் கோவிலில், புரட்டாசி சனிக்கிழமை விழாவில், ஏராளமான பக்தர்கள் பங்கேற்றனர்.‌

கோவை மாவட்டத்தில் மிகவும் பிரசித்தி பெற்ற வைணவ ஸ்தலம், காரமடை அரங்கநாதர் கோவில். இங்கு ஒவ்வொரு ஆண்டும், புரட்டாசி சனிக்கிழமை விழா வெகு விமர்சையாக கொண்டாடப்படும். இந்த ஆண்டு புரட்டாசி மாத முதல் சனிக்கிழமை விழா, கடந்த மாதம், 16ம் தேதி துவங்கியது. இன்று புரட்டாசி மூன்றாவது சனிக்கிழமை விழாவை முன்னிட்டு, அதிகாலை, 3:30 மணிக்கு கோவில் நடை திறந்து, மூலவர் அரங்கநாதருக்கு திருமஞ்சனம் நடந்தது. அதைத் தொடர்ந்து, 4:00 மணிக்கு, பக்தர்கள் வழிபாட்டுக்கு கோவில் திறக்கப்பட்டது. பின்பு ஸ்ரீதேவி, பூதேவி சமேதராக, உற்சவமூர்த்தி அரங்கநாத பெருமாள் சிறப்பு அலங்காரத்தில் எழுந்தருளினார். அங்கு வேத பாராயணம், உபநிஷ அஷ்டோத்திரம் சேவிக்கப்பட்டது. பின்பு தீபாராதனை காண்பித்து, தீர்த்த பிரசாதம் வழங்கப்பட்டது.

தாசர் வழிபாடு: கோவில் முன்பு ஏராளமான தாசர்கள் அமர்ந்திருந்தனர். கோவிலுக்கு வந்த பக்தர்கள், தாங்கள் கொண்டு வந்த அரிசி, பருப்பு காய்கறிகளை தாசர்களுக்கு படைத்தனர். தாசர்கள் சங்கு ஊதி, சேகண்டி அடித்து பூஜை செய்து, பக்தர்களுக்கு சிறிதளவு அரிசி பருப்பு பொருட்களை வழங்கினர். வீடுகளில் பொங்கல் வைத்து, விரதத்தை முடிக்க, பக்தர்கள் தாசர்களிடம் இருந்து, சிறிதளவு உணவு பொருட்களை, வீடுகளுக்கு பெற்றுச் சென்றனர். கோவிலில், குரு ஞான குருகுல பன்முக கல்வி நிலைய மாணவிகளின், பரதம், பாட்டு, இசை ஆகிய கலை நிகழ்ச்சிகள் நடைபெற்றன. இதற்கான ஏற்பாட்டினை நிகழ்ச்சி ஒருங்கிணைப்பாளர் தனலட்சுமி செய்திருந்தார். விழாவில் கோவில் ஸ்தலத்தார், அர்ச்சகர்கள், அலுவலர்கள், ஊழியர்கள் என, ஏராளமானோர் பங்கேற்றனர். விழா ஏற்பாடுகளை செயல் அலுவலர் லோகநாதன் மற்றும் கோவில் ஊழியர்கள் செய்து இருந்தனர்.