கோபி; காந்தி ஜெயந்தியை முன்னிட்டு, கவுந்தப்பாடி அருகே செந்தாம்பாளையம் காந்தி கோவிலில், சிறப்பு பூஜை நடந்தது. ஈரோடு மாவட்டம், கவுந்தப்பாடி அருகே செந்தாம்பாளையத்தில் காந்தி கோவில் நிறுவி, கடந்த, 1997 பிப்.,6ல் கும்பாபிஷேக விழா நடந்தது. கையில் தடியுடன், ஐந்தடி உயரத்தில், காந்தி சிலையும், அதன் எதிரே அன்னை கஸ்துாரி பாய் சிலையும் தத்ரூபமாக உள்ளது. இக்கோவிலில் ஆண்டுதோறும் ஜன.,26ல், குடியரசு தினம், ஆக.,15ல், சுதந்திர தினம், அக்.,2ல், காந்தி ஜெயந்தி என மூன்று நாட்களில் சிறப்பு அபிஷேகம், ஆராதனை நடக்கிறது. பிற நாட்களில் மூன்று வேளையும் பூஜை நடக்கிறது. காந்தி ஜெயந்தியை முன்னிட்டு, கவுந்தப்பாடி அருகே பெருந்தலையூர் பவானி ஆற்றில் இருந்து நேற்று தீர்த்தம் எடுத்து வரப்பட்டது. காலை, 9:00 மணிக்கு காந்தி மற்றும் அன்னை கஸ்துாரி பாய் சிலைக்கு பால், தயிர், மஞ்சள், சந்தனம், திருமஞ்சனம், பன்னீர், இளநீர் மற்றும் புனித நீர் ஊற்றி சிறப்பு அபிஷேகம் நடந்தது. தொடர்ந்து காந்திக்கு கதர் வேட்டி, கையில் தேசிய கொடி, நெற்றியில் விபூதி, சந்தனம், குங்குமம் வைத்து சிறப்பு அலங்காரம் செய்யப்பட்டது. இதேபோல், அன்னை கஸ்துாரி பாய் சிலைக்கு, பல்வேறு வாசனை திரவியங்களில் அபிஷேகம் செய்து அலங்காரம் செய்யப்பட்டது. ஏராளமானோர் பங்கேற்றனர்.