துாத்துக்குடி ; கழுகுமலை கழுகாசலமூர்த்தி கோவிலுக்கு சொந்தமான சொத்துக்கள் எத்தகைய நிபந்தனை அடிப்படையில் குத்தகைக்கு அனுமதிக்கப்பட்டன; ஏன் பொது ஏலத்திற்கு கொண்டுவரவில்லை என்பதற்கு அறநிலையத்துறை அறிக்கை தாக்கல் செய்ய உயர்நீதிமன்ற மதுரைக் கிளை உத்தரவிட்டது.

கழுகுமலை வெள்ளதுரை தாக்கல் செய்த மனு: கழுகுமலையில் உள்ள பழமையான கழுகாசலமூர்த்தி கோவில், ஹிந்து சமய அறநிலையத்துறையின் கட்டுப்பாட்டில் உள்ளது. கோவிலுக்கு சொந்தமாக, 292 ஏக்கர் நிலம், கட்டடங்கள் உள்ளன. இவற்றை கோவில் நிர்வாகம், அறநிலையத்துறை முறையாக பராமரிப்பதில்லை. பொது ஏலம் நடத்தாமல், விதிகளை பின்பற்றாமல் சிலரது பயன்பாட்டிற்காக சொத்துக்கள் குத்தகைக்கு அனுமதிக்கப்பட்டுள்ளது. சில தனிப்பட்ட நபர்கள் பயனடைகின்றனர்; குறைந்த வாடகை வசூலிக்கப்படுகிறது. கோவிலுக்கு வருவாய் இழப்பு ஏற்படுகிறது. சிலர் சட்டவிரோதமாக ஆக்கிரமித்துள்ளனர். அவர்களை வெளியேற்ற நடவடிக்கை இல்லை. துாத்துக்குடி ஹிந்து சமய அறநிலையத்துறை இணை கமிஷனர், கோவிலுக்கு சொந்தமான இடத்தை அறநிலையத்துறையின் அனுமதியின்றி அனுபவிக்கும் நபர்களை குத்தகைதாரர்களாக ஏற்றுக் கொண்டு, வாடகை வசூலிக்கப்படுகிறது. இவர்களை குத்தகைதாரர்களாக வரன்முறை செய்ய நடவடிக்கை எடுக்கப்பட்டுள்ளது. கழுகுமலையில் குறிப்பிட்ட பட்டா எண்ணில் குத்தகைதாரர்கள் உள்ளனர். இச்சொத்திற்கு பொது ஏலம் நடத்த சாத்தியக்கூறுகள் இல்லை என, உத்தரவிட்டுள்ளார். இது, ஆக்கிரமிப்பாளர்களை வரன்முறைப்படுத்தும் நோக்கில் பிறப்பிக்கப்பட்டுள்ளது. இணை கமிஷனரின் உத்தரவிற்கு இடைக்காலத் தடை விதிக்க வேண்டும். குத்தகைதாரர்களுடனான ஒப்பந்தத்தை ரத்து செய்ய வேண்டும்.பொது ஏலம் நடத்தி ஒதுக்கீடு செய்ய உத்தரவிட வேண்டும். இவ்வாறு வெள்ளதுரை குறிப்பிட்டார். நீதிபதி பி.புகழேந்தி: இணை கமிஷனரின் உத்தரவிற்கு இடைக் காலத் தடை விதிக்கப் படுகிறது. சொத்துக்களை குத்தகைக்கு அனுமதிக்க குழு அமைக்கப்பட்டதா, எத்தகைய நிபந்தனைகள் அடிப்படையில் குத்தகைக்கு அனுமதிக்கப்பட்டது, ஏன் பொது ஏலத்திற்கு கொண்டுவரவில்லை. குத்தகைக்கு விடப்பட்ட சொத்துக்கள் தற்போது யார், யாரிடம் உள்ளன, அதனால் கிடைத்த வருவாய் எவ்வளவு விபரத்தை அறநிலையத்துறை கமிஷனர், இணை கமிஷனர், கழுகாசலமூர்த்தி கோவில் செயல் அலுவலர் அறிக்கையாக அக்., 18ல் தாக்கல் செய்ய வேண்டும். இவ்வாறு உத்தரவிட்டார்.