காஞ்சிபுரம்; காஞ்சிபுரம் வரதராஜப் பெருமாள் கோயிலில் வைகாசி பிரம்மோத்ஸவம் தேரோட்டத்தில் லட்சக்கணக்கான பக்தர்கள் குவிந்தனர்.

காஞ்சிபுரம் வரதராஜ பெருமாள் கோவிலில் வைகாசி பிரம்மோற்சவம், கடந்த 20ம் தேதி கொடியேற்றத்துடன் துவங்கியது. அன்று காலையில் தங்க சப்பரத்திலும், மாலை, சிம்ம வாகனத்திலும் வரதராஜ பெருமாள் எழுந்தருளி உலா வந்தார். இரண்டாம் நாள் உற்சவமான கடந்த 21ம் தேதி காலையில், ஹம்ஸ வாகனத்திலும், மாலை சூரிய பிரபையிலும் வரதராஜ பெருமாள் எழுந்தருளி உலா வந்தார். மூன்றாம் நாள் பிரபல உற்சவமான கடந்த 22ம் தேதி காலை கருடசேவை உற்சவமும், மாலை ஹனுமந்த வாகன உற்சவமும் நடந்தது. இதில், நான்காம் நாள் உற்சவமான கடந்த 23ம் தேதி காலை சேஷ வாகனமும், மாலை சந்திர பிரபை வாகனமும் நடந்தது. ஐந்தாம் நாள் உற்சவமான நேற்று முன்தினம் காலை, வரதராஜ பெருமாள், நாச்சியார் திருக்கோலத்திலும், இரவு யாளி வாகனத்திலும் எழுந்தருளி உலா வந்தார். ஆறாம் நாள் உற்சவமான நேற்று காலை, ஸ்ரீதேவி, பூதேவியருடன், வரதராஜ பெருமாள், வேணுகோபாலன் திருக்கோலத்தில், தங்க சப்பரத்தில் எழுந்தருளி வீதியுலா வந்தார். இரவு யானை வாகன உற்சவம் நடந்தது.

இதில், ஏழாம் நாள் இன்று காலை விழாவின் முக்கிய நிகழ்ச்சியான தேரோட்டம் நடைபெற்றது. விழாவில் லட்சக்கணக்கான பக்தர்கள் பங்கேற்று தேரை வடம் பிடித்தனர். தேர் முழக்கி வீதிகள் வழியே வலம் வந்தது. எஸ்.பி., சண்முகம் தலைமையில், 1,500 போலீசார், ஊர்க்காவல் படையினர், தேசிய மாணவர் படையினர், நாட்டு நலப்பணி திட்ட மாணவர்கள் பாதுகாப்பு பணியில் ஈடுபட்டனர். 28ம் தேதி அனந்தசரஸ் திருக்குளத்தில் தீர்த்தவாரியும் நடக்கிறது.