தமிழகத்தின் பல்வேறு மாவட்டங்களை சேர்ந்த ஏராளமான பக்தர்கள் நேற்று அதிகாலை முதல் தாணிப்பாறை மலை அடிவாரத்தில் குவிந்தனர். இதனால் காலை 5:40 மணிக்கு வனத்துறை கேட் திறக்கப்பட்டு பக்தர்கள் மலையேற அனுமதிக்கப்பட்டனர். எளிதில் தீப்பற்றும் பொருட்களை பக்தர்கள் கொண்டு செல்கின்றனரா என வனத்துறையினர் பரிசோதனை செய்தனர். மதியம் 12 00 மணி வரை 6 ஆயிரத்துக்கும் மேற்பட்ட பக்தர்கள் மலையேறியதாக வனத்துறையினர் தெரிவித்தனர். ஆனால், 12 மணியையும் கடந்து வந்த பக்தர்கள் மலையேற அனுமதிக்கபடததால் வனத்துறை கேட்முன்பு தவிப்புடன் காத்திருந்தனர். வழக்கத்தைவிட வெயிலின் தாக்கம் அதிகமாக காணப்பட்ட நிலையிலும் குழந்தைகள் முதல் முதியவர்கள் வரை மலையேறினர்.

கோயிலில் சுந்தர மகாலிங்கம், சந்தன மகாலிங்கம், சுந்தரமூர்த்தி சுவாமிகளுக்கு பிரதோஷ வழிபாடு பூஜைகளை கோயில் பூசாரிகள் செய்தனர். பக்தர்கள் நீண்ட வரிசையில் நின்று சுவாமி தரிசனம் செய்தனர். ஏற்பாடுகளை கோயில் நிர்வாகம் செய்திருந்தனர். விருதுநகர், மதுரை மாவட்ட போலீசாரும், வத்திராயிருப்பு, சாப்டூர் வனத்துறையினரும் பாதுகாப்பு பணியில் ஈடுபட்டனர். மலையில் கோயில் சார்பிலும், அடிவாரத்தில் தனியார் அன்னதான மடங்கள் சார்பிலும் பக்தர்களுக்கு அன்னதானம் வழங்கப்பட்டது. மருத்துவ குழுவினர், தீயணைப்பு துறையினர், தயார் நிலையில் இருந்தனர்.‌ மதுரை மற்றும் ஸ்ரீவில்லிபுத்தூர் அரசு போக்குவரத்து கழகத்தின் சார்பில் சிறப்பு பஸ்கள் இயக்கப்பட்டன. வெயிலின் தாக்கம் அதிகமாக காணப்படுவதால் மேலும் பல இடங்களில் கூடுதல் தண்ணீர் தொட்டிகள் வைத்து, அதில் எந்நேரமும் குடிநீர் இருப்பதையும், தற்காலிக பஸ் ஸ்டாண்டில் நிழற் பந்தல்கள் அமைக்கவும், போதிய அளவில் சுகாதார வளாகம் அமைக்கப்பட வேண்டும் என்பதும் பக்தர்களின் வேண்டுகோளாகும்.