சிவகங்கை, சிவகங்கை மாவட்டத்தில் அனைத்து அம்மன், சிவன், பெருமாள் கோயில்களில் ஆடிப்பூரத்தை முன்னிட்டு அம்பாள் வளையல் அலங்காரத்தில் காட்சி அளித்தார். ஆடியில் செவ்வாய், வெள்ளி, ஆடிப்பூரம் போன்ற நாட்களில் அம்பாளுக்கு சிறப்பு அபிஷேக, ஆராதனை செய்து பக்தர்கள் வழிபாடு நடத்துவர். முத்துமாரியம்மன், காளியம்மன் கோயில்களில் அம்மனுக்கு பெண்கள் பச்ச மஞ்சள் அபிஷேகம் செய்தும், மாவிளக்கு மற்றும் எலுமிச்சை விளக்கு ஏற்றி வழிபாடு நடத்தி வருகின்றனர். இன்று ஆடிப்பூர விழாவை முன்னிட்டு சிவகங்கை சுந்தரராஜ பெருமாள் கோயிலில் ஸ்ரீதேவி, பூதேவியருடன் சுந்தரராஜ பெருமாள் வளையல் அலங்காரத்தில் எழுந்தருளினார். சுவாமிக்கு சிறப்பு அபிஷேக, ஆராதனை நடந்தது. பெண்கள் வளையல் பெற்று சென்றனர். * நாட்டரசன்கோட்டை கரிகால சோழீஸ்வரர் கோயிலில் ஆடிப்பூரத்தை முன்னிட்டு திருக்கல்யாணம் நடந்தது. சுவாமி, அம்பாளுடன் வளையல் அலங்காரத்தில் எழுந்தருளினர். ஏராளமான பக்தர்கள் சுவாமி தரிசனம் செய்தனர். *காரைக்குடி சங்கரமடத்தில், பிராமணர் சங்கம் சார்பில் திருவிளக்கு பூஜை நடைபெற்றது. பெண்கள் திருவிளக்கு ஏற்றி பூஜை செய்தனர். * சிவகங்கை விஷ்ணு துர்க்கை கோயிலில் ஆடிப்பூரத்தை முன்னிட்டு பக்தர்கள் பால்குடம் எடுத்து நேர்த்தி செலுத்தினர். கோயிலில் சண்டியாகம் நடைபெற்றது. பக்தர்களுக்கு அன்னதானம் வழங்கினர்.