சிவகங்கை; சிவகங்கை மாவட்டம் குன்றக்குடி சண்முகநாத பெருமான் கோயில் யானை சுப்புலட்சுமி 53, தீயில் கருகி பரிதாபமாக இறந்தது தொடர்பாக பாகன் கார்த்தியை 45, வனத்துறை அதிகாரிகள் கைது செய்தனர்.

சிவகங்கை மாவட்டம் ஆத்தங்குடியைச் சேர்ந்த பக்தர் ஒருவர் 1971 ல் குன்றக்குடி சண்முகநாத பெருமான் கோயிலுக்கு பெண் யானை சுப்புலட்சுமியை வழங்கினார். 53 ஆண்டுகளாக குன்றக்குடி வரும் பக்தர்களின் செல்ல பிள்ளையாகவே சுப்புலட்சுமி வாழ்ந்தது.

செப்., 11 இரவு 11:00 மணிக்கு யானை தங்கியிருந்த தகர கொட்டகைக்கு கீழ் கட்டியிருந்த தென்னந்தட்டியில் தீப்பற்றி யானை காயமடைந்தது. தீக்காயத்துடன் யானைக்கு சிகிச்சை அளித்த கால்நடை பல்கலை டாக்டர்கள் 72 மணி நேரத்திற்கு பின் தான் உடல் நிலை சீராகுமா என தெரியும் என கூறினர். ஆனால் காயமுற்ற 25 மணி நேரத்திற்குள் செப்., 13 அதிகாலை 2:00 மணிக்கு யானை இறந்தது. பக்தர்கள் கண்ணீர் மல்க யானை கோயிலுக்கு அருகில் அடக்கம் செய்யப்பட்டது. மாவட்ட வன அலுவலர் பிரபாவதி தலைமையில் வனத்துறையினர் இச்சம்பவம் குறித்து விசாரித்து வருகின்றனர். முதற் கட்ட விசாரணையில் யானையை அடக்க பயன்படும் ‛அங்குசத்திற்கு’ செப்., 11 இரவு 10:00 மணிக்கு விளக்கு ஏற்றி வழிபட்ட பின் அவ்விளக்கை அணைக்காமல் பாகன் வீட்டிற்கு சென்று விட்டார். அந்த விளக்கிலுள்ள தீ பரவியதில் தான் யானை பரிதாபமாக இறந்தது தெரியவந்தது. இதையடுத்து பாகன் குன்றக்குடி கார்த்தியை 45, வனத்துறை அதிகாரிகள் கைது செய்து ராமநாதபுரம் சிறையில் அடைத்தனர்.

பாகனின் கவனக்குறைவு: வன அலுவலர் பிரபாவதி கூறியதாவது: பாகன் யானை காலில் செயின் போடாமல் அதை நேரடி கண்காணிப்பில் வைத்திருக்க வேண்டும். அன்று இரவு யானையின் காலில் செயின் கட்டிவிட்டு, வீட்டிற்கு சென்றுள்ளார். கவனக்குறைவாக இருந்ததற்காக அவர் மீது வழக்கு பதிந்து கைது செய்தோம் என்றார்.