திருப்பதி; திருமலை திருப்பதியில் ஆண்டு முழுவதும் 450 விழாக்கள் நடக்கின்றன அவற்றுள் சிகரம் வைத்தது போல நடப்பது பிரம்மோற்சவ விழாவாகும். இறைவனே நடத்துவதாக கருதப்படும் இந்த விழாவைக்காண பக்தர்கள் நாட்டின் பல பகுதிகளில்  இருந்தும் வருவர், அதிலும்  கருட வாகனத்தன்று  திருமலையே கொள்ளாத அளவிற்கு பல  லட்சம் பக்தர்கள் திரள்வர். இந்த வருடம் இன்று (அக்.,4ல்) துவங்கி 12ம் தேதி வரை பிரம்மோற்சவம் நடைபெறுகிறது. முக்கிய நிகழ்ச்சியான கொடியேற்றம் இன்று மாலை 5:45 மணிக்கு நடைபெற உள்ளது. இரவு 9 மணிக்கு பெரிய சேஷ வாகனத்தில் சுவாமி உலா வந்து அருள்பாலிக்க உள்ளார்.

5ம் தேதி காலை 8 மணி சின்ன சேஷ வாகனத்திலும், இரவு 7 மணிக்கு ஹம்ச வாகனத்திலும் சுவாமி உலா வருகிறார். 6ம் தேதி காலை 8 மணி சிம்ம வாகனம், இரவு 7 மணி முத்துப்பந்தல் வாகனம்.7ம் தேதி காலை 8 மணி கற்பகவிருட்ச வாகனம், இரவு 7 சர்வபூபாள வாகனம். 8ம் தேதி காலை 8 மணி மோகினி அவதாரம், இரவு 6:30 மணி கருட வாகனம். 9ம் தேதி காலை 8 மணி ஹனுமந்த வாகனம, மாலை 4 மணி தங்க ரதம்: இரவு 7 மணி யானை வாகனம். 10ம் தேதி காலை 8 மணி சூர்ய பிரபை வாகனம், இரவு 7 மணி  சந்திர பிரபை வாகனம். 11ம் தேதி காலை 7 மணி தேரோட்டம், இரவு 7 மணி குதிரை வாகனம். 12ம் தேதி காலை 6 மணி சக்ர ஸ்நானம், இரவு 8:30 மணி கொடியிறக்கம் நடைபெற உள்ளது.

காலை  இரவு வேளைகளில் சுவாமி சன்னதி தெருவில் வாகனத்தில் வலம் வரும் போது பல்வேறு மாநில கலைஞர்களின் கலை நிகழ்ச்சிகள் நடைபெறும்.திருவிழா நாட்களில் மூலவர் தரிசனம் என்பது ஏற்கனவே பதிவு செய்தவர்களுக்கே சிரமமாக இருக்கும், தர்மதரிசனத்திற்கு செல்பவர்கள் நீண்ட நேரம் வரை காத்திருக்கவேண்டியிருக்கும். 08ம் தேதி நடைபெறும் மோகினி அவதாரத்தின் போது,மோகினி அவதாரத்தில் வரும் மலையப்பசுவாமி  ஸ்ரீவில்லிபுத்துார் ஆண்டாள் சூடிக்கொடுத்த  மாலையை அணிந்து வருவார் என்பது விசேஷம், இதற்காக இரண்டு நாட்களுக்கு முன்பாகவே ஸ்ரீவில்லிபுத்துாரில் இருந்து மாலை சென்றடையும்.